Qazaqstan shet memleketterden azamattyq jáne saýda isteri boıynsha dálelder alýǵa quqyly bolady - Senat
ASTANA. QazAqparat -Búgin Senattyń Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysynda «Azamattyq nemese saýda isteri boıynsha shetelde dáleldemelerdi alý týraly konventsııany ratıfıkatsııalaý týraly» zań jobasy talqylandy.
Atalǵan konventsııa 1970 jyly 18 naýryzda Gaagada jasalǵan.
«Byltyrǵy jyldyń sońynda Qazaqstan Eýropalyq Odaqpen áriptestik aýqymyn keńeıte túsý týraly jańa kelisimsharty qabyldanǵan bolatyn. Osynyń aıasynda Azamattyq nemese saýda isteri boıynsha shetelde dáleldemelerdi alý týraly konventsııany ratıfıkatsııalaý usynylady. Bul rette Eýropalyq Odaq halyqaralyq jáne jeke quqyqtar týraly Gaaga konventsııasyna Qazaqstannyń qatysýyna qoldaý bildiretin bolady. Al qaralyp otyrǵan qujat azamattyq sot óndirisiniń ámbebap tártibin aıqyndaıdy», - dedi zań jobasy boıynsha baıandaǵan Ádilet vıtse-mınıstri Elvıra Azımova.
Onyń aıtýynsha, Konventsııa shet memleketterde azamattyq jáne saýda isteri úshin dálelder alýǵa jaǵdaı jasaıdy. Bul rette sheteldik qatysýlarmen bolatyn ekonomıkalyq, ınvestıtsııalyq daýlarǵa qatysty qazaqstandyq sottardyń ókilettigi keńeıtiledi.
«Konventsııany otandyq sottardyń halyqaralyq isterdegi ókilettigin nyǵaıtý dep qarastyrsa da bolady. Qujat qabyldansa Qazaqstan atalǵan baǵytta 53 memleketpen dáleldemeler, aıǵaqtar alý boıynsha yntymaqtastyqty jandandyrady. ıAǵnı, Konventsııaǵa qosylý árbir memleketpen jeke-jeke kelisimsharttar jasamastan, kelisim aıasyndaǵy Qazaqstannyń shet eldermen yntymaqtastyq aıasyn keńeıtedi», - dedi E. Azımova.
Zań jobasy Senattyń aldaǵy jalpy otyrysyna talqylaýǵa shyǵarylady.
