Qazaqstan shet elderden tikeleı ınvestıtsııa tartý boıynsha Ortalyq Azııada kósh bastap tur — Prezıdent
ASTANA. KAZINFORM — Qazaqstan shet elderden tikeleı ınvestıtsııa tartý boıynsha Ortalyq Azııada kósh bastap tur. Bul týraly Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev aıtty.
«Qazaqta „Eńbegine qaraı — ónbegi“ degen sóz bar. Muny, eń aldymen, aýyl halqynyń eren eńbeginiń jemisi deýge bolady. Memleket tarapynan da tıisti jumys júrgizildi, qajetti kómek berildi. Qazir elimizde jańa ekonomıkalyq baǵdar aıasynda naqty sharalar qolǵa alynyp jatyr. Júıeli jumystardyń nátıjesinde ınflıatsııa deńgeıi tómendedi, sondaı-aq ulttyq ekonomıkanyń ósimi 2024 jyldyń qańtar-qazan aılarynda 4 paıyzdan asyp, jaqsy qarqyn aldy. Munaıdan tys salalardy damytý arqyly oń dınamıka baıqalady. Bul — mańyzdy úderis», — dedi Qasym-Jomart Toqaev.
Memleket basshysynyń atap ótýinshe, ishki jalpy ónim ósiminiń úshten ekisinen astamy saýda, óńdeý ónerkásibi, qurylys pen aýyl sharýashylyǵyna tıesili. Osy baǵyttaǵy belsendi jumysty jalǵastyrý kerek.
«Qazaqstan shet elderden tikeleı ınvestıtsııa tartý boıynsha Ortalyq Azııada kósh bastap tur. Bıyl jetekshi halyqaralyq reıtıng agenttikteri Qazaqstannyń qazirgi nesıe reıtıngi ınvestıtsııalyq senimdilik deńgeıinde turǵanyn rastady. Qyrkúıekte Moody’s agenttigi Qazaqstannyń uzaqmerzimdi reıtıngin „Turaqty“ deńgeıine kóterdi. Bul — Táýelsiz Qazaqstan tarıhyndaǵy eń úzdik nátıje», — dedi Prezıdent.
