Qazaqstan shet eldegi qandastaryn kóshirip alý úshin jylyna 13 mıllıon dollar bóledi
ASTANA. Qazannyń 29-y. QazAqparat /Marlan Jıembaı/ - Aǵymdaǵy jyly Qazaqstannyń 8 myń oralmanǵa arnalǵan kvotasy bos tur. Bul jaıynda www.bnews.kz portalynda ótken Online-konferentsııa barysynda QR Eńbek jáne halyqty áleýmettik qorǵaý mınıstrligi Kóshi-qon komıtetiniń tóraǵasy Qabylsaıat Ábishev aıtty,
dep habarlaıdy QazAqpart.
Onyń aıtýynsha, osy jyly 20 myń otbasyna kvota bólinse, sonyń 12 myńyna ǵana ótinish túsken. Al qalǵan 8 myńy bos tur, bul ortasha eseppen 40 myń adamdy quraıdy. Jalpy oralmandar kóshiniń baıaýlaýyna Úkimetti kinálaýdyń esh sebebi joq. Memleket eshkimdi olardyń yqtııarynsyz tarıhı otanyna kóshire almaıdy.
«Qazaqstan shet eldegi qandastaryn kóshirip alý úshin jylyna 13 mıllıon dollar bóledi. Mundaı aýqymdy qarajat bizden basqa memleketterde bólingen emes. Máselen, Germanııa otandastaryn kóshirip alý úshin jylyna 4 mıllıon, al Izraıl bolsa 6 mıllıon dollar qarjy jumsaıdy. Biz bolsaq qarjy daǵdarysyna qaramastan, atalǵan somany tek kvota esebinde berip otyrmyz», deıdi Q.Ábishev.
