Qazaqstan sheneýnikteriniń jemqorlyqqa qanshalyqty jaqyn ekeni tekseriledi

NUR-SULTAN. QazAqparat – Elimizde sheneýnikterdiń sybaılas jemqorlyqqa qarsy tózimdiligi men turaqtylyǵyna tekserý júrmek. Bul týraly QR Sybaılas jemqorlyqqa qarsy is-qımyl agenttiginiń tóraǵasy Marat Ahmetjanov OKQ-de ótken baspasóz máslıhatynda málim etti, dep habarlaıdy QazAqparat tilshisi.

«Sybaılas jemqorlyqqa qarsy saıasat qyzmetiniń 2022 – 2026 jyldarǵa arnalǵan tujyrymdamasy bar. Onyń aıasynda paraqorlyqty azaıtý maqsatynda sheneýnikterdiń sybaılas jemqorlyqqa tózbeýine, turaqtylyǵyna tekserý (integrity check) júrgizý josparlanyp otyr. Bul adal emes qyzmetkerlerdi ýaqtyly anyqtaýǵa jáne jumystan bosatýǵa múmkindik beredi», - dedi Marat Ahmetjanov brıfıngte.

Sondaı-aq vedomstvo basshysy atalǵan tujyrymdama aıasynda mınıstrler men ákimderdi baǵalaý júıesi de qarastyrylǵanyn tilge tıek etti.

«Adamnyń sybaılas jemqorlyq qylmys jasap, memleketke zııan keltirgenin kútpeı-aq, zańdy tártiptik sharalar arqyly shyǵynsyz, túbegeıli joıýǵa bolady. Mundaı sharalar memlekettik qyzmetke baıý úshin kelýdi toqtatyp, uzaq merzimdi keleshekte parasatty kásibı urpaq qalyptastyrýdy qamtamasyz etedi. Sonymen qatar, bizdiń agenttik qoǵam únine qulaq asý úshin jemqorlyqpen kúrestiń ulttyq ındeksin bekitýdi usynyp otyr. Sheneýnikter men qyzmetkerlerdi tekserý, baǵalaý júıesi jobalyq negizde engiziletin bolady», - deıdi ol.

Buǵan deıin M. Ahmetjanov qazaqstandyq sheneýnikterdiń jemqorlyq jasaýdyń túrli ádis-tásilderin qoldanatynyn aıtqan edi.