Qazaqstan shekarasynan zańsyz túrde iri kólemde temeki ótkizbek bolǵandar ustaldy

NUR-SULTAN. QazAqparat - 2020 jylǵy 5 maýsymda Qazaqstan shekarashylary Soltústik Qazaqstan oblysyndaǵy «Jańa jol» avtomobıl pýnktinde Qazaqstanǵa iri kólemde temeki ótkizbek bolǵandardyń jolyn kesti.

Bul týraly QR Ulttyq qaýipsizdik komıtetiniń baspasóz qyzmeti habarlady.

«Uıymdastyrýshylar zańsyz kirgizý úshin 15 myń qorap temekini «SDEK» pochtalyq kompanııasy júginiń astyna jasyrǵan. Temekiniń qujattary men aktsızdik markalary joq. Bul is jáne tárkilengen temeki partııasy Soltústik Qazaqstan oblysy boıynsha Memlekettik kirister departamentine tapsyryldy»,-delingen habarlamada.

Sondaı-aq onda shekaradaǵy ótkizý beketinde aktsız markalary joq temeki ótkizbek bolǵandardyń birneshe márte joly kesilgendigi aıtylady.