Qazaqstan shekarasynan bıyl 20,5 mln adam ótken

ASTANA. QazAqparat – Bıyl 7 aıda Qazaqstan shekarasynan 20,5 mln adam ótken. Bul týraly Ulttyq qaýipsizdik komıteti Shekara qyzmetiniń bıylǵy birinshi jartyjyldyqtaǵy qyzmettiniń qorytyndysyna arnalǵan brıfıngide Shekaralyq baqylaý departamenti bastyǵynyń birinshi orynbasary Ǵanı Aǵadilov aıtty, dep habarlaıdy QazAqparat tilshisi.

«Qazir Qazaqstan Respýblıkasynyń perımetri boıynsha Úkimet qaýlylarymen 101 ótkizý pýnkti aıqyndalǵan. Onyń ishinde avıatsııalyq, teńiz, ózen, temirjol, avtomobıl ótkizý beketteri bar. Qytaı Halyq Respýblıkasymen aradaǵy shekarada 7 ótkizý pýnkti ashylyp, jumys istep tur. Qyrǵyz Respýblıkasymen arada – 8, Ózbekstan – 11, Túrikmenstan – 2, Reseı – 51, sandaı-aq 3 teńiz jáne 19 avıatsııalyq ótkizý pýnkti jasaqtalǵan. Ótkizý pýnkteriniń barlyǵy memleketter arasyndaǵy kelisimderge sáıkes shtattyq rejımde jumys istep tur», - dedi Ǵ. Aǵadilov búgin Ortalyq kommýnıkatsııalar qyzmetinde.

Ótkizý pýnkterinde shekarashylar qujattardy tekserý barysynda shekaradan ótý zańdylyǵyn qadaǵalaıdy. Shekara buzýshylardy anyqtaý, sondaı-aq shekara arqyly tyıym salynǵan materıaldar men zattardy alyp ótýdiń jolyn kesý maqsatynda kólik quraldary tekseriledi. Tyıym salynǵan materıaldar men zattar sanatyna qarý-jaraq, oq-dári, esirtki, jarylǵysh, ýlandyrǵysh, radıoaktıvti zattar jatady.

«Byltyrmen salystyrǵanda, 2023 jyldyń 7 aıynda adamdar men kólikterdiń shekaradan ótýi eki esege artqan. Buǵan elimizdiń kóliktik-tranzıttik áleýetin arttyrý, jańa áýe baǵyttaryn ashý, kelý týrızmin damytý maqsatynda sheteldikter úshin vızalyq jáne ımmıgratsııalyq erejelerdi jeńildetý yqpal etti. Atalǵan kezeńde memlekettik shekara arqyly jalpy 20 mln 527 myń 689 adam, 4 mln 492 myń 435 kólik ótkizildi. Táýligine orta eseppen 190 myń adamǵa deıin (onyń ishinde 90 myńǵa deıin sheteldik) jáne 30 myńǵa deıin kólik ótedi», - dedi Ǵanı Aǵadilov.

Budan habarlanǵandaı, Qazaqstanǵa zańsyz kirýge áreket jasaǵan sheteldikterdiń sany artty.