Qazaqstan shekarasyn zańsyz kesip ótken Qytaı azamattary ustaldy
ASTANA. QazAqparat - Qazaqstannyń memlekettik shekarasyn buzyp ótken 46 qytaı azamattary anyqtaldy, dep habarlaıdy QR UQK Shekara qyzmetiniń baspasóz qyzmetinen.
Elimizdiń ońtústigindegi «Qordaı» shekara otrıadyna qarasty «Sortóbe» zastavasynyń shekarashylary qazaq-qyrǵyz shekarasyn buzǵan 7 qytaılyq azamatty ustady. Olarǵa qatysty Qordaı shekara otrıadynyń tergeý bólimi aldyn ala Qylmystyq Kodekstiń 392-babynyń 1-tarmaqshasy boıynsha qylmystyq is qozǵady. Tergeý barysynda memlekettik shekara buzýshylardyń jalpy sany 46 adam ekendigi anyqtaldy. Barlyǵy alǵashqyda «Úrimshi-Manas» baǵytyndaǵy ushaqpen qyrǵyz eline kelipti. Jumys izdegen qytaılyqtar odan keıin áldebir uıymdastyrýshylardyń kómegimen qazaq-qyrǵyz shekarasynan ótken. Odan keıin olardyń 39-y Ońtústik Qazaqstan oblysyna sapar shekkendigi belgili boldy.
«Nelegal-2015» is-sharasynyń aıasynda 20 mamyr kúni qazaqstandyq shekarashylar Ońtústik Qazaqstan oblysy boıynsha Ulttyq qaýipsizdik komıtetiniń jáne ishki ister departamentteriniń qyzmetkerlerimen birlese otyryp jedel izdestirý sharalaryn ótkizdi. Birlese ótkizilgen is-sharanyń nátıjesinde 39 qytaılyq azamattyń meken-jaıy anyqtalyp, barlyǵy da qolǵa tústi.
Qazirgi ýaqytta atalǵan derek boıynsha qylmystyq is qozǵalyp, tergeý amaldary júrgizilýde.
