Qazaqstan shekarasyn kesip ótken 5 ózbek úsip qala jazdady
ASTANA. QazAqparat - Oral shekara otrıady «Muqataı» zastavasynyń aýmaǵynda Reseıden Qazaqstan aýmaǵyna kirgen 5 ózbekstandyq ustaldy. Bul týraly QR Ulttyq qaýipsizdik komıtetiniń Shekara qyzmetinen málim etti, dep habarlaıdy QazAqparat tilshisi.
Komıtet dereginshe, ustalǵandardyń eń úlkeni 46 jasta, al eń kishisi 28-de. Olardyń barlyǵyn úsik shalǵan. Ózbekstan azamattary birden Darınsk aýylyndaǵy aýdandyq emhanaǵa jetkizildi. Dárigerlerdiń qoıǵan dıagnozyna sáıkes, olardyń bireýiniń aıaq-qoldaryn 3-4-inshi dárejeli, ekeýin 2-3-inshi dárejeli, taǵy ekeýin 1-dárejeli úsik shalǵan.
«Bireýiniń jaǵdaıy aýyr, qarqyndy terapııa palatasynda jatyr. Ekeýiniń jaǵdaıy ortasha, qalǵan ekeýi emge muqtaj emes. Qazirgi ýaqytta beseýi de shekarashylardyń kúzetimen Batys Qazaqstan oblysynyń Zelenov aýdanynyń Darınsk aýylyndaǵy emhanada em alýda», - delingen taratylǵan aqparatta.
