Qazaqstanǵa jyl basynan beri 12,3 mln sheteldik keldi

ASTANA. KAZINFORM – Onyń ishinde 660 myńnan astam shetel azamaty Qazaqstanda ýaqytsha turýǵa ruqsat aldy.

- Kóshi-qon salasy Іshki ister mınıstrliginiń qatań baqylaýynda. Sońǵy jyldary elimizge keletin shetel azamattarynyń sany ósip keledi. Jyl basynan beri 12,3 mln shetel azamaty keldi, 11, 2 mln azamat elden shyqty. Shetel azamattarynyń kóbisi Ózbekstan, Reseı, Qyrǵyzstan, Qytaı jáne Tájikstan elderinen keledi, - dedi Іshki ister mınıstrligi Kóshi-qon qyzmeti komıtetiniń tóraǵasy Aslan Atalyqov ortalyq kommýnıkatsııalar qyzmeti alańynda ótken baspasóz máslıhatynda.

Mınıstrlik ókiliniń málimdeýinshe, elimizge keletin sheteldikterdiń basym bóligi týrıster nemese Qazaqstan arqyly tranzıtpen ótetinder.

- Jyl basynan beri 660 myńnan astam shetel azamaty Qazaqstanda ýaqytsha turýǵa ruqsat aldy, Olardyń 90 paıyzy eńbek etý maqsatynda kelgen. Ýaqytsha turýǵa ruqsat alǵan shetel azamattary kóbine respýblıkalyq mańyzy bar qalalarda, sondaı-aq batys jáne ońtústik óńirlerde turyp jatyr, - deıdi spıker.

Buǵan deıin qazaqstandyqtar jumys isteýge kóbine qaı elderge baratyny týraly jazǵan edik.

Aıta keteıik, Qazaqstanda qandas mártebesin uzartý tártibi jeńildetildi.