Qazaqstan shekarasyndaǵy sanıtarlyq baqylaý: 2025 jyly 6 mıllıonnan astam adam tekserildi
ASTANA.KAZINFORM - Qazaqstanda memlekettik shekarada sanıtarııalyq-karantındik baqylaý adam densaýlyǵyna qaýipti juqpaly jáne juqpaly emes aýrýlardyń ákelinýiniń aldyn alý maqsatynda táýlik boıy júzege asyrylady.
Baqylaý jumysy Sanıtarııalyq-epıdemıologııalyq baqylaý komıtetiniń bólimsheleri arqyly 26 ótkizý pýnktinde, onyń ishinde halyqaralyq áýejaılarda, temirjol ótkelderinde, teńiz porttarynda jáne «Qorǵas» pýnktinde, sondaı-aq Qazaqstan Qarjy mınıstrliginiń Memlekettik kirister komıteti arqyly 14 avtomobıl ótkizý pýnktinde qamtamasyz etiledi.
2025 jyly sanıtarııalyq-karantındik baqylaýmen 6,6 mıllıonnan astam adam jáne 48,7 myń kólik quraly qamtyldy. 84 jolaýshydan dene qyzýynyń joǵarylaýy anyqtaldy, asa qaýipti ınfektsııalarǵa kúdik tirkelgen joq. Medıtsınalyq kórsetkishter boıynsha 26 adam aýrýhanaǵa jatqyzyldy.
2025 jyldyń basynan beri Qazaqstan aýmaǵynda asa qaýipti ınfektsııalardyń syrttan ákelingen jaǵdaılary tirkelgen joq.
Daıyndyq deńgeıin arttyrý maqsatynda Almaty áýejaıynda vedomstvoaralyq oqý-jattyǵýlar, sondaı-aq kólik nysandarynda 38 oqý-trenıngtik is-shara ótkizildi. Týrıstik kompanııalarmen jáne halyqpen profılaktıkalyq jáne aqparattyq jumys jalǵasyp jatyr.
Aıta keteıik, Ózbekstan Qazaqstanmen shekaradaǵy shekteýlerdi uzartady.