Qazaqstan shekarasynan asa iri kólemde esirtki alyp ótken qyrǵyzstandyq 15 jylǵa sottaldy

ASTANA.KAZINFORM - Qyrǵyz Respýblıkasynyń azamaty Qazaqstan Respýblıkasynyń Memlekettik shekarasy arqyly qarbyz arasyna jasyrylǵan tyıym salynǵan zattardy zańsyz ótkizgeni úshin kináli dep tanyldy.

Pavlodar oblystyq prokýratýrasy baspasóz qyzmetiniń habarlaýynsha, tergeý nátıjesinde 59 kılogrammnan astam geroın men 10 kılogramm gashısh tárkilendi.

Sot shetel azamatyn kináli dep tapty jáne 15 jylǵa bas bostandyǵynan aıyrý jazasyn taǵaıyndady.

Sonymen qatar, sot Qazaqstan Respýblıkasynyń azamatyn joǵaryda atalǵan aýyr qylmys týraly aldyn ala bile tura, quqyq qorǵaý organdaryna habarlamaǵany úshin kináli dep tanyp, 2 jyl 2 aıǵa bas bostandyǵynan aıyrdy.

Úkim zańdy kúshine engen joq.

- Bul jaǵdaı esirtkiniń zańsyz aınalymy aýyr saldarǵa ákeletinin taǵy bir márte dáleldeıdi. Quqyqtyq tártip organdary qoǵam qaýipsizdigin qamtamasyz etýdi, zańdylyqty saqtaýdy qamtamasyz etip, esirtki qylmysyna qarsy belsendi kúresti jalǵastyrýda.

Osyǵan deıin esirtki kontrabandasymen aınalysty dep kúdik keltirilgen adam Reseıden ekstradıtsııalanǵany týraly jazdyq.