Qazaqstan shekarasyn Kaspıı arqyly zańsyz kesip ótken úsh ırandyq sottaldy
AQTAÝ. KAZINFORM – Mańǵystaý oblysynda Kaspıı teńizi arqyly Qazaqstannyń memlekettik shekarasyn zańsyz kesip ótken Iran Islam Respýblıkasynyń úsh azamatyna qatysty sot úkimi shyǵaryldy.
Bıyl 24 shildede Iran Islam Respýblıkasynyń úsh azamaty balyq aýlaý kezinde Kaspıı teńizi arqyly Qazaqstan Respýblıkasy shekarasyn zańsyz kesip ótken.
Atalǵan azamattar Qazaqstan Respýblıkasy Ulttyq qaýipsizdik komıtetiniń Shekara qyzmetiniń áskerı qyzmetshilerimen ustalǵan.
Qazaqstan Respýblıkasy Qylmystyq kodeksiniń 392-babynyń 1-1-bóligimen, ıaǵnı adamdar tobynyń aldyn ala sóz baılasýy boıynsha memlekettik shekarany ótkizý pýnktterinen tys jerde qasaqana zańsyz kesip ótý faktisi boıynsha qylmystyq is qozǵalǵan.
– Qaraqııa aýdandyq sotynyń úkimimen Iran Islam Respýblıkasynyń úsh azamaty kináli dep tanylyp, olarǵa Qazaqstan Respýblıkasynyń sheginen tys jerge shyǵaryp jibere otyryp, bir jylǵa bas bostandyǵynan aıyrý túrindegi jaza taǵaıyndaldy. Sot úkimi qazirgi ýaqytta zańdy kúshine engen joq. Memlekettik shekarany ótkizý pýnktterinen tys jerde zańsyz kesip ótý zańnamada belgilengen jaýaptylyqqa ákep soǵady, – delingen prokýratýra habarlamasynda.
Aıta keteıik, bıyl sáýirde Batys Qazaqstan oblysynda memlekettik shekarany ótkizý beketinen tys jerden zańsyz kesip ótken úsh shetel azamatyna qatysty sot úkimi shyqqan edi. Olardyń ekeýi 6 aıǵa bas bostandyǵynan aıyrylyp, taǵy bireýine 1 mln 376,2 myń teńge aıyppul salyndy. Úsheýi de Qazaqstan aýmaǵynan shyǵaryldy.
