Qazaqstan shekarany zańsyz kesip ótetinderge qatań jaza qoldanady

ASTANA. QazAqparat – Qazaqstan Taıaý Shyǵys pen Aýǵanstandaǵy turaqsyz jaǵdaıǵa baılanysty memlekettik shekarany kesip ótkenderge qoldanatyn jazany kúsheıtpek. Mundaı ózgeris «QR keıbir zańnamalyq aktilerine Qylmystyq, Qylmystyq-protsestik jáne Qylmystyq-atqarý kodeksterin ońtaılandyrý máseleleri boıynsha ózgerister men tolyqtyrýlar engizý týraly» QR Zań jobasynda qaralǵan, dep habarlaıdy QazAqparat tilshisi.

«QR memlekettik shekarasyn qasaqana zańsyz kesip ótken sheteldik nemese azamattyǵy joq adam Qazaqstan aýmaǵynan tysqary 5 jyl merzimge shyǵaryla otyryp, oǵan 2 000 aılyq eseptik kórsetkishke deıingi mólsherde aıyppul salynady ne 3 jylǵa deıin bas bostandyǵynan aıyrylady», - dep jazylǵan jańa redaktsııada.

Qujattyń túsindirmesinde kórsetilgendeı, jazany qatańdatý sharasy Taıaý Shyǵystaǵy turaqsyz jaǵdaı men Aýǵanstandaǵy ahýalǵa baılanysty qabyldanyp otyr.

«Jaqynda Taıaý Shyǵystaǵy turaqsyz jaǵdaı jáne Aýǵanstandaǵy jedel jaǵdaıdyń shıelenisýi úlken alańdaýshylyq týǵyzdy. Osyǵan baılanysty jalǵan qujattar boıynsha el aýmaǵyna zańsyz kirý áreketteri jıilep ketti. Sonymen qatar, qoldanystaǵy qylmystyq zańnama QR Memlekettik shekarasyn qasaqana zańsyz kesip ótýge áreket jasaǵany úshin adamdardy jaýapqa tartýǵa múmkindik bermeıdi. Óıtkeni bul áreket aýyrlyǵy az qylmystarǵa jatqyzylǵan», - dep túsindirme berilgen.

Toqtala ketsek, qoldanystaǵy zań boıynsha shekarany zańsyz kesip ótkenderge qoldanylatyn eń qatań jaza – 1 jylǵa deıin bas bostandyǵanan aıyrý. Engizilgeli otyrǵan ózgeristerge saı, endi mundaı qylmystar úshin kináli 3 jylǵa deıin sottalýy múmkin.