Qazaqstan shekaralasatyn eldermen Keden odaǵy aıasyndaǵy jaýapkershilik keden qyzmetiniń moınyna túsedi - Úkimet basshysy
A. Jeltoqsannyń 14-i. QazAqparat /Ernur Aqanbaı/ - Qazaqstan shekaralasatyn eldermen Keden odaǵy aıasyndaǵy jaýapkershilik keden qyzmetiniń moınyna túsedi.
Bul týraly búgin Dúnıejúzilik keden uıymynyń Astanadaǵy Óńirlik oqytý ortalyǵynyń ashylý rásiminde Premer-Mınıstr Kárim Másimov aıtty, dep habarlaıdy QazAqparat.
«2010 jylǵy shildeniń 1-nen bastap Qazaqstan men Reseı aýmaǵy arasyndaǵy kedendik baqylaý alynyp tastalady. Osylaısha biz ózimizge mynadaı mindetteme alamyz: Qazaqstan shekaralasatyn eldermen Keden odaǵy aıasyndaǵy jaýapkershilik Qazaqstannyń keden odaǵy moınyna túsedi. Keden odaǵy boıynsha bizdiń áriptesterimiz birinshi nazar aýdarǵan másele, bul esirtkilerdiń zańsyz aınalymy boldy. Reseı Federatsııasy osy máseleni kóterdi. Meniń oıymsha, Úkimet sheńberinde biz qabyldaıtyn bolyp kelisken sharalar, keden qyzmetine jáne shekara qyzmetine bólinip jatqan qosymsha resýrstar buǵan tosqaýyl qoıýy tıis. Sizderge suraǵan qarjy bólindi. Sondyqtan, kedendik shekara aıasyndaǵy jaýapkershilik tolyqtaı keden qyzmetine júkteledi. Kedendik beketter joq jerde jaýapkershilik shekara qyzmetine túsedi», dedi Úkimet basshysy Kedendik baqylaý komıtetiniń tóraǵasyna qaratyp aıtqan sózinde.
Úkimet basshysynyń aıtýynsha, Qazaqstannyń keden qyzmeti sońǵy jyldarda zamanaýı qondyrǵylarmen jabdyqtaldy. «Úkimet retinde biz bárin jasadyq. Endi ótkizý beketterinde jaýapkershilik sizderge júkteledi», dedi K. Másimov.
K. Másimovtyń aıtýynsha, ol kórshi elderdegi áriptesterimen áńgimelesken. Onda Keden odaǵyn qura otyryp Ortalyq Azııa óńirindegi elder arasyndaǵy saýda-sattyqqa kedergi keltirmeý, zańdy saýda-sattyq úshin bul protsedýralardy qalaı jeńildetý máselesi talqylanǵan.
«Qatarynan ekinshi jyl býyrqanyp jatqan álemdik ekonomıkalyq daǵdarys bizderdiń elder arasyndaǵy óńirlik kooperatsııalar, óńirdegi kórshi elder arasyndaǵy saýda-sattyqty jeńildetý bizderdiń ekonomıkalarymyzdy damytý úshin tabystyń kilti ekenin taǵy bir márte dáleldedi. Bizderdiń shekaralarymyz zańdyq turǵydan qanshalyqty ońaı ári ashyq bolatyn bolsa, kompanııalarǵa jáne ekonomıkalarymyzǵa belgili bir oń nátıjelerge qol jetkizý sonshalyqty jeńil bolady. Sonymen bir mezgilde, taýarlardyń zańsyz aınalymyna, bizderdiń shekaralarymyz arqyly esirtkilerdiń, qarý-jaraqtardyń jáne kontrabandalardyń zańsyz tasymaldanýyna tosqaýyl qoıýymyz qajet. Meniń oıymsha, dál osy sımbıozdy: ıaǵnı taýarlardyń zańdy aınalymyna barynsha jaǵdaı jasaýdy, al kez-kelgen zańsyz dúnıege tosqaýyl qoıýdy keden qyzmeti oryndaýy tıis», dedi Premer-Mınıstr.
