Qazaqstan shekarada baqylaý rejimin kúsheıtedi

ASTANA. QazAqparat - Qazaqstanda sheteldikter men qazaqstandyqtardyń kirip-shyǵýyn baqylaýshy «Búrkit» biryńǵaı aqparattyq júıesin jańǵyrtýdy josparlanýda.

Bul týraly búgin QR Іshki ister mınıstrligi jedel-krımınalıstik departament basshysynyń mindetin atqarýshy Álisher Muhamedov málim etti, dep habarlaıdy QazAqparat.

«Shyntóbe» dıskýssııalyq alańynda «Daktıloskopııalyq jáne genomdyq tirkeý týraly» zań jobasyn talqylaý barysynda qazaqstandyq bloger Denıs Krıvosheev atalmysh júıeniń kemshilikterine toqtaldy. Onyń sózinshe, elge kirgen sheteldikter uzaq kezekte turýǵa májbúr.

«Biz tólqujat tekserisinen ótemiz. Tamasha nárse. Sizderde «Búrkit» júıesi kidirip, turyp qalatyny bar. Tólqujatqa engizilgen chıpter de jumys istemeıdi. Sizderde adamdar tólqujatty arnaıy skanerge qoıady, ol barlyǵynyń qujattaryn skanerlep alady. Bunyń ózi 7-10 mınýt ýaqytty alady», - dedi Krıvosheev.

Óz kezeginde, Álisher Muhamedov «Búrkit» júıesi QR Ulttyq qaýipsizdik komıtetiniń aqparattyq bazasy ekenin eske saldy. Degenmen ol blogerdiń suraǵyna jaýap berýge tyrysty.

«Qazirgi ýaqytta atalmysh júıeni malaızııalyq júıeniń negizinde jetildirý kózdelýde. Onda jańa jabdyqtar ornatylady, ol da avtomattandyrylǵan. Bul elektrondyq vızalardy engizý, shekarada baqylaýdy kúsheıtý aıasynda júrgiziletin bolady», - dep atap ótti ІІM ókili.