Qazaqstan shegirtkege qarsy kúreste halyqaralyq tehnıkalyq kómek aldy
ASTANA. KAZINFORM — FAO Qazaqstanǵa shegirtkege monıtorıng júrgizý jáne oǵan qarsy kúresýge arnalǵan jabdyqtar tapsyrdy, dep habarlaıdy AShM baspasóz qyzmeti.
Birikken Ulttar Uıymynyń Azyq-túlik jáne aýyl sharýashylyǵy uıymy (FAO) shegirtkege monıtorıng júrgizý jáne oǵan qarsy kúres júıesin kúsheıtý maqsatynda Fıtosanıtarııalyq dıagnostıka jáne boljamdar jónindegi respýblıkalyq ádistemelik ortalyqqa arnaıy jabdyqtardy tapsyrdy.
Ol TCP/KAZ/4006 «Shegirtke oshaqtaryn baqylaý men monıtorıngti kúsheıtýge arnalǵan tehnıkalyq qoldaý» jobasy aıasynda júzege asyryldy.
— Atalǵan jabdyqtar shegirtke zııankesteri týraly derekterdi jınaý, óńdeý jáne kórneki túrde usyný sapasyn arttyrýǵa múmkindik beredi. Noýtbýkter oqytý jumystaryna jáne dalalyq zertteýlerge paıdalanylsa, syrtqy derek tasymaldaǵyshtar geoaqparattyq derekterdi qaýipsiz saqtaýdy qamtamasyz etedi. Al ushqyshsyz ushý apparattaryna (BPLA) arnalǵan qosymsha akkýmýlıatorlar statsıonarlyq elektr qýaty kózderi joq shalǵaı aýmaqtarda monıtorıng júrgizýge jol ashady, — delingen mınıstrlik habarlamasynda.
Sonymen qatar, Japonııanyń halyqaralyq yntymaqtastyq agenttigi (JICA) qarjylandyratyn FAO-nyń Kavkaz ben Ortalyq Azııa elderinde shegirtkege qarsy ulttyq jáne óńirlik kúresti jetildirýge baǵyttalǵan GCP/INT/384/JCA jobasy aıasynda Ortalyqqa táýekel aımaqtaryndaǵy halyqtyń habardarlyǵyn arttyrýǵa arnalǵan aqparattyq materıaldar da berildi. Bul materıaldarda pestıtsıdterdi qaýipsiz qoldaný jónindegi usynymdar qamtylǵan.
FAO-nyń Qazaqstandaǵy baǵdarlamalar úılestirýshisi Jańyl Bozaevanyń aıtýynsha, tapsyrylǵan jabdyqtar men materıaldar shegirtke oshaqtarynyń aldyn alý jáne monıtorıng júrgizý salasyndaǵy ulttyq qyzmetterdiń áleýetin nyǵaıtyp, azyq-túlik qaýipsizdigin qamtamasyz etý men aýyl sharýashylyǵynyń ornyqty damýy úshin mańyzdy ról atqarady.
FAO Qazaqstanmen jáne óńirdiń basqa da elderimen shegirtke zııankesterine monıtorıng júrgizý jáne olarǵa qarsy kúres júıelerin odan ári jetildirý baǵytynda yntymaqtastyqty jalǵastyra beredi.
Budan buryn Qazaqstan TMD elderimen birlesip shegirtkege qarsy kúresetinin jazǵanbyz.