Qazaqstan shaıbaly hokkeı federatsııasynyń prezıdenti astanalyq áýesqoı hokkeıshilerdiń chempıonatyn bastap berdi
ASTANA. 20 qazan. QazAqparat - Qazaqstan shaıbaly hokkeı federatsııasynyń prezıdenti Asqar Mamın Astana qalasynyń áýesqoı komandalary arasyndaǵy shaıbaly hokkeıden ashyq chempıonattyń ashylý rásmine qatysty.
A. Mamınniń aıtýynsha, «naǵyz erlerge arnalǵan sport» Qazaqstanda turaqty damyp kele jatyr. «Sonyń aıqyn dáleli Qazaqstan áýesqoılary hokkeı lıgasynyń qurylýy. Sondaı-aq, elimizdiń túkpir-túkpirde sportqa, sonyń ishinde dál osy hokkeıge arnalǵan sport saraılarynyń kóptep salynýy», - dep atap ótti ol.
Іs-sharanyń basty maqsaty QR Prezıdenti Nursultan Nazarbaevtyń Joldaýyna sáıkes buqaralyq sportty damytý, elorda turǵyndarynyń bos ýaqytyn tıimdi ótkizýin qamtamasyz etý, halyqtyń ár sanatyn, balalar men jasóspirimderdi hokkeımen aınalysýǵa tartý, deıdi uıymdastyrýshylar.
Jarysqa ardagerler men jastar quramalarynan jasaqtalǵan 15 komanda qatysty. Bıyl astanalyq chempıonatqa Almaty, Qaraǵandy, Rýdnyı qalalarynyń komandary qatysty.
