Qazaqstan Shanhaıdaǵy kórmede tórt alańda óz ónimderin usyndy

ASTANA. KAZINFORM – Shanhaı halyqaralyq ımporttyq taýarlar kórmesi segizinshi jyl qatarynan ótip jatyr. Bıylǵy CIIE kórmesine 155 elden ókilder men 4100-den astam sheteldik kompanııa qatysýda.

Kásibı kelýshilerdiń sany 449 myńnan asty. Qazaqstan tarapynan 100-den astam óndirýshi qatysyp otyr. Bul elimizdiń CIIE kórmesine qatysý tarıhyndaǵy eń joǵary kórsetkish.

«Qazaqstan úshin Shanhaı kórmesine qatysý – strategııalyq baǵytqa aınaldy. Bul alań otandyq óndirýshilerge jańa eksporttyq múmkindikter ashyp, tek Qytaıǵa ǵana emes, basqa da álemdik naryqqa shyǵýǵa jol salady», – dedi QR Saýda jáne ıntegratsııa mınıstri Arman Shaqqalıev.

Mınıstrdiń aıtýynsha, Qytaı ekonomıkasyndaǵy jańa baǵyttar bul kórmeniń mańyzyn arttyra túsken. «Qytaı ishki tutynýdy arttyrý úshin ımportqa basymdyq berip otyr. Bul – álemniń túkpir-túkpirinen sapaly taýarlardyń kelýine múmkindik beredi. El úkimetiniń resmı jol kartasyna sáıkes, bıyl damýshy eldermen, sonyń ishinde Ortalyq Azııamen saýdany damytýǵa erekshe kóńil bólingen», – dedi mınıstr.

Shanhaı kórmesine qatysý arqyly qazaqstandyq kompanııalar eksporttyq kelisimder jasap qana qoımaı, álemdegi eń iri tutyný naryǵyna jol ashyp keledi. Sońǵy bes jylda Qazaqstan men Qytaı arasyndaǵy ózara saýda kólemi eki esege ósip, 2024 jyly 30,2 mlrd dollarǵa jetti.

QazTrade málimetine saı, Shanhaı kórmesine qatysý arqyly qazaqstandyq kompanııalar sońǵy jyldary jalpy quny 306,5 mln dollardan asatyn kelisimsharttar jasaǵan. Tek 2023–2024 jyldary maı ónimderi, et, ósimdik maıy, túıe súti untaǵy, shyryndar men pıýreler jetkizý jóninde ondaǵan kelisimge qol qoıyldy. Bıyl aýyl sharýashylyǵy jáne azyq-túlik ónimderin Qytaıǵa, sondaı-aq Ońtústik-Shyǵys Azııa men Parsy shyǵanaǵy elderine eksporttaýǵa arnalǵan jańa uzaqmerzimdi kelisimderge qol qoıý josparlanyp otyr.

Kórme aıasynda QazTrade pen Qytaıdyń Optimize Integration Group (OIG) kompanııasy ózara túsinistik týraly memorandýmǵa qol qoıdy. Qujat eki el arasyndaǵy tsıfrlyq saýdany damytýǵa, onlaın-platformalar men zamanaýı tsıfrlyq quraldar qurýǵa, eksporttyq protsesterdi jedeldetýge baǵyttalǵan. Taraptar qazaqstandyq azyq-túlik pen aýyl sharýashylyǵy ónimderin Qytaı naryǵyna birlesip ilgeriletý, zamanaýı tehnologııalar men logıstıkany damytý jáne ózara esep aıyrysý sharttaryn jaqsartý jóninde kelisti.

OIG Group – Qytaıdaǵy azyq-túlik ımporty salasyndaǵy eń iri jáne tehnologııalyq kompanııalardyń biri. Ol eldiń eń iri 500 kásipornynyń qataryna kiredi, álem boıynsha 31 myń jetkizýshimen jumys isteıdi, Qytaıda 15 keńsesi jáne 11 sheteldik ókildigi bar. Kompanııa platformasy arqyly Qytaıǵa ákelinetin muzdatylǵan ónimderdiń 18% ótedi. ıAǵnı, Qytaı naryǵyndaǵy árbir jetinshi sıyr eti steıki, ár altynshy taýyq tós eti jáne ár besinshi asshaıan – OIG arqyly jetkiziledi.

«Saýda jáne ıntegratsııa mınıstrligi shaǵyn jáne orta bıznestiń halyqaralyq naryqqa shyǵýy men jahandyq qun tizbekterine kirigýi úshin jaǵdaı jasap keledi. Biz qazaqstandyq ónimdi Qytaı naryǵyna óńirlendirý qaǵıdaty boıynsha ilgeriletýdemiz, ıaǵnı túrli provıntsııalarda pavılondar, ókildikter jáne saýda úıleri ashylýda. Qazirdiń ózinde Úrimji men Nankın qalalarynda seriktestik keńseler jumys isteıdi. Kórmeniń qorytyndysy boıynsha qazaqstandyq kompanııalardyń geografııalyq qatysý aıasyn keńeıtý jóninde jańa ýaǵdalastyqtarǵa qol jetkizdik. Búginde Qazaqstan kórmeniń barlyq tórt alańynda tanystyrylyp otyr: ulttyq pavılonda, Qytaı kooperatıvteriniń jalpy federatsııasy – China Co-Op pavılonynda, Jiangsu SOHO alańynda, sondaı-aq bıyl alǵash ret Almaty qalasy óz jeke pavılonymen qatysýda. Keshendi tásildiń arqasynda bıyl biz óndirýshilerdiń rekordtyq sanyn tarttyq», – dedi QR Saýda jáne ıntegratsııa mınıstri Arman Shaqqalıev.

Qytaımen birlesken baǵdarlama aıasynda ónimderdi qytaı naryǵynyń talaptaryna beıimdeý boıynsha akseleratsııa ótkizý josparlanyp otyr: býyp-túıý, brendteý jáne taýarlardy ilgeriletý. Sondaı-aq kooperatıv kásipkerlerine arnalǵan bilim berý baǵdarlamasy júzege asyrylýda, onda olar ónimdi sertıfıkattaý jáne Qytaı naryǵyna shyǵý erekshelikteri boıynsha oqýdan ótedi.

Aıta keteıik, Amsterdam qalasynda qazaq mádenıetiniń kórmesi ashyldy.