Qazaqstan Shanhaıda týrıstik áleýetin tanystyrdy
ASTANA. KAZINFORM — Shanhaı qalasynda ITB China 2026 halyqaralyq týrıstik kórmesi ótti, dep habarlaıdy QR SІM baspasóz qyzmeti.
Atalǵan kórmede Qazaqstan Respýblıkasynyń eki basty qalasy – Astana men Almaty tanystyryldy. Qazaqstan pavılony ITB kórmesiniń ortalyq bóliginde ornalasyp, oǵan Qazaqstannyń 17 týroperatory, sondaı-aq Air Astana jáne Fly Arystan áýe kompanııalary qatysty.
Qazaqstan Respýblıkasynyń Shanhaı qalasyndaǵy Bas konsýldyǵynyń qoldaýymen Almaty qalasynyń ákimdigi halyqaralyq jáne Qytaı naryǵynda ońtústik megapolıstiń týrıstik áleýetin ilgeriletýge baǵyttalǵan «Almatynyń Shańhaıdaǵy týrızm kúnin» uıymdastyrdy.
Qazaqstannyń Shanhaıdaǵy Bas konsýly Nurlan Aqqoshqarov Almatynyń búgingi tańda Qazaqstannyń eń iri megapolısi ǵana emes, sonymen qatar Ortalyq Azııadaǵy zamanaýı týrıstik, mádenı jáne iskerlik ortalyqqa aınalǵanyn atap ótti.
Bas konsýl Qytaı naryǵymen yntymaqtastyqty kúsheıtýin mańyzdylyǵyna toqtaldy. 2023 jylǵy qarashada eki el arasynda ózara vızasyz rejımniń engizilýinen jáne 2026 jylǵy naýryzda Air Astana áýe kompanııasynyń Almaty – Shanhaı tikeleı reısiniń ashylýynan keıin Qazaqstan men Qytaı arasyndaǵy týrıstik baılanystardy nyǵaıtýdyń zor áleýeti bar ekenine senim bildirip, qytaılyq seriktesterdi yntymaqtastyqty odan ári keńeıtýge shaqyrdy.
Shanhaı qalasynyń ortalyǵynda ótken bı fleshmoby ITB China 2026 kórmesindegi Qazaqstan qatysýynyń basty ereksheligine aınalyp, halyqaralyq aýdıtorııanyń nazaryn aýdarýǵa jáne Qazaqstannyń zamanaýı ári serpindi beınesin qalyptastyrýǵa kómektesti.
ITB China 2026 – ulttyq týroperatorlar, áýe kompanııalary, qonaqúı jelileri jáne týrıstik ındýstrııa ókilderi bas qosatyn iri B2B týrıstik kórme bolyp tabylady. Bıyl Shanhaıda ótken halyqaralyq týrıstik bırja jumysyna álemniń 80 elinen týroperatorlar qatysty.
Budan buryn Almaty–Shańhaı reısi eki el týrızmin jaqyndastyrǵanyn jazdyq.
