Qazaqstan Shanhaı yntymaqtastyq uıymynda 2024 jyldy «Ekologııa jyly» dep jarııalaýdy usynady

ASTANA. QazAqparat - Qazaqstan barsha seriktesterdi «Soltústik-Shyǵys» pen «Shyǵys-Batys» kólik dálizderine qatysty ekonomıkalyq, saýda, kólik jáne ınvestıtsııalyq jobalardy birlese júzege asyrýǵa shaqyrady. Bul týraly Prezıdent Qasym-Jomart Toqaev «BRIKS Plıýs» dıalogy otyrysynda málimdedi, dep habarlaıdy QazAqparat.

«Asa mańyzdy «Bir beldeý – bir jol» bastamasyn tolyqtyratyn Transkaspıı halyqaralyq kólik dálizi saýda salasyndaǵy yntymaqtastyqqa keń múmkindik ashady.

Mundaı yqpaldastyq óńiraralyq saýda-sattyqtyń damýyna jáne bizdiń aımaqtardyń kólik-tranzıt áleýetin tolyq tanytýǵa septigin tıgizedi», - dedi Memleket basshysy.

Ol klımattyń ózgerýi jahandyq aýqymdaǵy teris saldarǵa ákelip soǵatyny barshamyzǵa málim ekenin de alǵa tartty.

«Sońǵy birneshe jylda Jahandyq Ońtústik jáne Ortalyq Azııa elderinde óte qatty qýanshylyq beleń alyp, basqa da tabıǵat apattar jıilep ketti.

Osyǵan oraı Qazaqstan Shanhaı yntymaqtastyq uıymynda 2024 jyldy «Ekologııa jyly» dep jarııalaýdy usynyp, osy ózekti problemany sheshý jolyndaǵy ortaq kúsh-jigerdi uıymdastyrýǵa daıyn ekenin bildirdi», - dedi Prezıdent.

Qasym-Jomart Toqaevtyń paıymynsha, ShYU-nyń Ekologııa jylyn ótkizý jónindegi is-qımyl jospary – ýaqtyly kóterilgen bastama.

«Bul bastama BRIKS-ke múshe memleketter tarapynan da qoldaý tabady dep úmittenemin», - dedi ol jıyn barysynda.