Qazaqstan shańǵymen tuǵyrdan sekirýden Norvegııadaǵy álem chempıonatynda 4 ret úzdik ondyqqa endi
ASTANA. KAZINFORM – Norvegııanyń Lıllehammer qalasynda shańǵymen tuǵyrdan sekirýden jasóspirimder arasynda álem chempıonaty aıaqtaldy.
Ulttyq olımpıadalyq komıtettiń málimetinshe, álem birinshiliginiń qorytyndysy boıynsha qazaqstandyq sportshylar tórt ret úzdik ondyqtyń qataryna endi.
Jekeleı synda Ilıa Mızernyh altynshy orynmen jarysty aıaqtady. Al áıelder arasyndaǵy komandalyq jarysta Anastasııa Gorýnova, Alısa Sedova, Alena Svırıdenko jáne Vıktorııa Rýleva jetinshi orynǵa ıe boldy.
Osy baǵdarlamada erler quramasy sapynda óner kórsetken Ilıa Mızernyh, Danııl Kalınkın, Artem Meshkov jáne Davıd Gaal altynshy orynǵa turaqtady.
Sonymen qatar Qazaqstan aralas komandalar arasyndaǵy jarysta da úzdik ondyqqa endi. Bul saıysta Ilıa Mızernyh, Artem Meshkov, Vıktorııa Rýleva jáne Alena Svırıdenko segizinshi oryn aldy.
Buǵan deıin shańǵymen tuǵyrdan sekirýden Ilıa Mızernyh Qazaqstan tarıhyndaǵy eń úzdik nátıjeni tirkegenin habarlaǵan edik.
