«Qazaqstan» shahtasyndaǵy órt: joǵalǵan kenshiler tabylýy múmkin oryndar anyqtaldy

ASTANA. QazAqparat – «Qazaqstan» shahtasyndaǵy órtten zardap shekken kenshilerdi izdeý jumysy jalǵasyp jatyr. Mamandar tabylmaı jatqan jumysshylardyń bolýy múmkin degen oryndardy anyqtady. Bul týraly JShS Qaraǵandy fılıaly dırektorynyń birinshi orynbasary Gennadıı Sılınskıı málim etti, dep habarlaıdy QazAqparat tilshisi.

«Jumysshylardy izdeý 4 bólimsheniń kómegimen túni boıy júrgizildi. Sonymen qatar Janna óndirisinde órt sóndirý jumysy qatar júrdi. Qabyldanǵan is-sharalar negizinde tórt baǵyt boıynsha taý-ken qazbalary zertteldi», - dedi Gennadıı Sılınskıı vıdeo túsiniktemede.

Onyń aıtýynsha, izdeý sharalary 8 saǵat 15 mınýtqa sozyldy, onyń nátıjesinde taǵy bir kenshiniń denesi tabyldy. Qazir ony jer betine evakýatsııalaý jumystary júrgizilip jatyr.

«Eki bólimsheniń kúshimen órtti sóndirý jumysy júrgizildi. Negizgi konveıer kólbeýiniń jalpy uzyndyǵy – 1990 metr. Búginde shamamen 40% tómennen joǵaryǵa ótti. Óndiris aımaǵyndaǵy órt sóndirilip, salqyndatyldy. Órt oshaǵyn joıý boıynsha jumys jalǵasyp jatyr. Qazirgi ýaqytta bul óndiristiń shamamen 40%-y salqyndatylǵan kúıde. Jumys jalǵasady. Kenshiler shyǵa almaı qalýy múmkin eki aýdan anyqtaldy. Іzdeý sharalaryn jalǵastyramyz, qıynǵa soqsa da barlaý júrgizemiz, - dep tolyqtyrdy spıker.

Eske salaıyq, «Qazaqstan» shahtasynda órt keshe, 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jalǵasyp jatyr.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bólimine jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.