«Qazaqstan» shahtasyndaǵy órt: 13 kenshige medıtsınalyq kómek qajet

TEMІRTAÝ. QazAqparat – 18 tamyzdaǵy jaǵdaı boıynsha «Qazaqstan» shahtasyndaǵy órtten zardap shekken 11 kenshi emdeý mekemelerinde jatyr, dep habarlaıdy QazAqparat.

Olardyń 2-eýi úı jaǵdaıynda ambýlatorlyq baqylaýda. Barlyǵy 13 kenshige medıtsınalyq kómek qajet.

Buǵan deıin dárigerler aýrýhanada jatqan eki shahter jan saqtaý bóliminen toksıkologııa bólimine aýystyrylǵanyn aıtqan bolatyn.

«17 tamyzda «Professor H.J. Maqajanov atyndaǵy kópbeıindi aýrýhanasyna» 9 shahter jetkizildi. Olardyń ekeýi reanımatsııadan toksıkologııa bólimine aýystyryldy. Jaǵdaıy aýyrlaý. Aýyrlyǵy jedel ıntoksıkatsııa sındromy men entsefalopatııaǵa, gemodınamıkanyń turaqsyzdyǵyna, ýlanýdyń toksıkogendik kezeńine baılanysty. Gemodınamıkalyq kórsetkishter turaqty», - delingen habarlamada.

Qalǵan 7 adam toksıkologııa bóliminde. Olardyń jaǵdaıy – ortasha aýyr. Aýyrlyǵy jedel ıntoksıkatsııa sındromy men entsefalopatııaǵa baılanysty. Gemodınamıkalyq kórsetkishter turaqty.