«Qazaqstan» shahtasynda qaza tapqandardyń otbasylaryna on jyldyq eńbekaqy tólenedi
QARAǴANDY. QazAqparat - «ArselorMıttal Temirtaý» kompanııasy 31 tamyz kúni «Qazaqstan» shahtasynda gazdan ýlanyp qaza tapqan kenshilerdiń otbasylaryna on jyldyq eńbekaqylaryn tóleıdi, dep habarlaıdy «QazAqparat» HAA tilshisi.
Mundaı aqshalaı ótemaqy ujymdyq eńbek kelisimshartynda qarastyrylǵan. Budan ózge, qaza tapqan azamattardyń týystaryna shıpajaılyq-medıtsınalyq mekemelerge joldama beriledi. Jumys berýshi qaza tapqandardyń balalarynyń mamandandyrylǵan orta jáne joǵary oqý oryndarynda bilim alýyn qarjylandyrýǵa mindetti.
Kompanııa tek kelisimsharttaǵy talaptarmen shektelip qalmaq emes. Kómir departamentiniń qyzmetshileriniń arnaıy toby ár otbasyna qandaı kómek kerektigin anyqtaýmen aınalysyp jatyr. Qajet bolǵan jaǵdaıda, qaıtys bolǵan azamattardyń bankterden alǵan nesıeleri tólenetin bolady. Kenshilerdi jerleý rásiminiń shyǵynyn da «ArselorMıttal Temirtaý» kompanııasy tolyqtaı óz moınyna aldy.
«ArselorMıttal Temirtaý» kompanııasynyń basshysy Paramjıt Kalon qaıtys bolǵandardyń otbasylaryna kelip, kóńil aıtty. Ol qaraly otbasylaryna ujymdyq kelisimshartta qarastyrylǵan barlyq mindettemelerdiń oryndalatyndyǵyna ýáde etti. Budan ózge, kompanııa basshylyǵy ár otbasynyń áleýmettik jaǵdaıyn anyqtap, sonyń negizinde taǵy da qosymsha kómek kórsetiletindigin aıtty.
2 qyrkúıek kúni «ArselorMıttal Temirtaý» AQ kompanııasynyń úsh bólimshesinde qaza tapqan azamattardy bir mınýt únsizdikpen eske alý sharasy ótkiziledi. Sol kúni, 2 qyrkúıekte olar jer qoınyna beriledi.
Aıta keterligi, búgin dárigerler metannan ýlanyp qalǵan 26 jasar kenshini úıine qaıtardy .
Tótenshe jaǵdaılar komıtetiniń habarlaýynsha «31 tamyzda tańǵy saǵat 4-ter shamasynda Qaraǵandy oblysy Shahtınsk qalasyndaǵy «Arselor Mıttal Temirtaý» kompanııasyna tıesili «Qazaqstan» shahtasynda kenet metan gazy taraǵan. Shahtada bastapqy málimet boıynsha 136 adam bolǵan. Al apatty ýchaskede aldyn ala derekke sáıkes 4 adam qalǵan. Qazirgi ýaqyttaǵy qolda bar derek boıynsha shahta qyzmetkerleri tirshilik belgisi joq 3 adamdy tapqan».
Keıin apatta qaza tapqan úsh kenshiniń aty jóni jarııa etildi.
Olar:
1. Ahmetjanov Rýstam Renatuly, 23.03.1983j., úılengen, 3 balasy bar.
2. Rýdenko Valerıı Valentınovıch, 18.05.1980 j., úılengen, 2 balasy bar.
3. Shebanov Maksım Sergeevıch, 24.05.1986 j., úılengen, 1 balasy bar.
«ArselorMıttal Temirtaý» AQ kompanııasy basshylyǵy «Qazaqstan» shahtasyndaǵy qaıǵyly jaǵdaıdyń mán-jaıyn habarlady. 
