«Qazaqstan» shahtasynda qalyp qoıǵan 3 shahterdiń qaı jerde ekeni belgili

ASTANA. QazAqparat – «Qazaqstan» shahtasynda qalyp qoıǵan 3 shahterdiń shamamen qaı jerde ekeni belgili. Bul týraly Qaraǵandy oblysy ákiminiń birinshi orynbasary Vadım Basın aıtty, dep habarlaıdy QazAqparat tilshisi.

«Eki shahterdiń múrdesi bastapqy bolǵan jerlerinen tabyldy. Belgili bir ýaqytta olardyń syrtqa shyǵýǵa talpynǵany baıqalady. Qozǵalystary kórinip turdy. Sodan keıin olar kómek kútip bir orynda qalǵan. Nege olar shyǵa almady? Óıtkeni olar qutqarýshylar jetýi múmkin emes aımaqta bolǵan», - dedi ol Qaraǵandy óńirlik kommýnıkatsııalar qyzmeti alańyndaǵy brıfıngte.

Onyń atap ótýinshe, shahtada temperatýra joǵary bolyp, qatty tútindegen.

«Óte qoıý tútin boldy. Qozǵalý múmkin emes. Sol sebepti keshe keshkisin ǵana birinshi adamǵa, búgin tańǵa jaqyn ekinshi adamǵa jete aldy. Qazirgi ýaqytta qalǵan úsh shahterdiń júıe ajyraǵan sátte qaı jerde bolǵanyn bilemiz. Olarǵa 3 top jyljyp barady», - dedi Vadım Basın.

Eske salaıyq, «Qazaqstan» shahtasynda órt keshe, 17 tamyz kúni saǵat 10:05-te tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

5 jumysshynyń taǵdyry belgisiz boldy. Keıin olardyń biriniń denesi tabyldy. Qalǵan 3 adamdy izdestirý jalǵasyp jatyr.

Qaraǵandydaǵy kómir shahtasynda zardap shekkenderdiń arasynda eki adam jansaqtaý bólimine jetkizilgeni týraly habarlaǵan edik.

Aıta keteıik, Prezıdent «Qazaqstan» shahtasynda bolǵan órt sebebin anyqtaý úshin jan-jaqty tergeý júrgizýdi tapsyrdy.