«Qazaqstan» shahtasynda gazdan ýlanǵan úsheýdiń biri aýrýhanadan shyqty
QARAǴANDY. QazAqparat - Dárigerler 31 tamyz kúni tańǵy saǵat tórtte «ArselorMıttal Temirtaý» AQ kompanııasyna qarasty «Qazaqstan» shahtasynda kenetten metan taralýy saldarynan ýlanyp qalǵan 26 jasar kenshini úıine qaıtardy, dep habarlaıdy «QazAqparat» HAA tilshisi.
Qaraǵandy oblysy densaýylq saqtaý basqarmasynyń baspasóz hatshysy Aıjan Isanyń málimdeýinshe, Vladımır Kalıadkanyń densaýlyǵyna tóngen qaýip joq.
«Naýqas oblystyq medıtsına ortalyǵynyń toksıkologııalyq bólimshesinde dárigerlerdiń baqylaýynda boldy. Onyń jaǵdaıy birqalypty, densaýlyǵyna shaǵym joq, tekserý barysynda eshqandaı aýrý belgileri anyqtalǵan joq. Ol úıine qaıtaryldy», - dedi Qaraǵandy oblystyq densaýlyq saqtaý basqarmasynyń baspasóz hatshysy Aıjan Isa.
Toksıkologııalyq bólimshege taǵy eki kenshi tústi - 1960 jylǵy Aleksandr Ivanov jáne 1974 jylǵy Aıat Turysbekov. «Olardyń qashan shyǵaryltatyndyǵy ázirge belgisiz. Biraq olardyń da ómirine tóngen qaýip joq», - dedi Aıjan Isa.
Eske sala ketsek, Tótenshe jaǵdaılar komıtetiniń habarlaýynsha «31 tamyzda tańǵy saǵat 4-ter shamasynda Qaraǵandy oblysy Shahtınsk qalasyndaǵy «Arselor Mıttal Temirtaý» kompanııasyna tıesili «Qazaqstan» shahtasynda kenet metan gazy taraǵan. Shahtada bastapqy málimet boıynsha 136 adam bolǵan. Al apatty ýchaskede aldyn ala derekke sáıkes 4 adam qalǵan. Qazirgi ýaqyttaǵy qolda bar derek boıynsha shahta qyzmetkerleri tirshilik belgisi joq 3 adamdy tapqan».
Keıin apatta qaza tapqan úsh kenshiniń aty jóni jarııa etildi.
Olar:
1. Ahmetjanov Rýstam Renatuly, 23.03.1983j., úılengen, 3 balasy bar.
2. Rýdenko Valerıı Valentınovıch, 18.05.1980 j., úılengen, 2 balasy bar.
3. Shebanov Maksım Sergeevıch, 24.05.1986 j., úılengen, 1 balasy bar.
«ArselorMıttal Temirtaý» AQ kompanııasy basshylyǵy «Qazaqstan» shahtasyndaǵy qaıǵyly jaǵdaıdyń mán-jaıyn habarlady.
