«Qazaqstan» shahtasynan bir shahterdyń denesi shyǵaryldy, 4 adam izdestirilip jatyr – naqtylanǵan aqparat

QARAǴANDY. QazAqparat – Naqtylanǵan aqparattar boıynsha, búgin órt bolǵan «Qazaqstan» kómir shahtasynan buǵan deıin habarlanǵandaı eki adamnyń emes bir adamnyń denesi shyǵaryldy. Osy oqıǵaǵa qatysty jaǵdaı boıynsha «ArselorMıttal Temırtaý» AQ-nyń atqarýshy dırektory Vıktor Gafıýlov málimet berdi, dep habarlaıdy QazAqparat.

Osy ýaqytta taǵy 4 adam izdestirilip jatyr.

«Qazaqstan» shahtasyndaǵy jaǵdaı boıynsha qazirgi tańda jeldetý rejımin durystap, habarsyz ketken shahterlardy izdeý úshin órtti oqshaýlaý jumystary júrip jatyr. Bir adamnyń denesi tabylyp, syrtqa shyǵaryldy. Qazirgi tańda Kásibı áskerılendirilgen avarııalyq-qutqarý qyzmetiniń 12 bólimshesi jumys istep jatyr. Biz shahterlardyń tabylatynynan áli de úmittimiz. Sol sebepti olardy izdeý jumystaryn jalǵastyra beremiz. Barlyqtaryńyzdy úmit úzbeı myqty bolýǵa shaqyramyz. Kómir departamentiniń búkil kúshi shahterlardy qutqarýǵa jumyldyryldy. Biz qurban bolǵan shahterlardyń otbasy men jaqyndaryna kóńil aıtamyz jáne olarǵa barlyq jaǵynan qoldaý kórsetemiz»,-dedi Vıktor Gafıýlov.

Aıta keteıik, búgin, 17 tamyz kúni saǵat 10:05-te «Qazaqstan» shahtasynda D6 kómir eńisin ıgerý barysynda konveıerlik taspa órtendi. Apatty joıý jospary engizildi.

Shahtada 227 adam bolǵan, olardyń 182-si evakýatsııalanyp, 45 adam shahtada qalyp qoıdy.

Keıinirek 222 adamnyń evakýatsııalanǵany habarlandy. Qaýipsiz jerge shyǵarylǵan 13 adam bas aýrýy men jótelge shaǵyndanǵan. Al 5 adamnyń taǵdyry belgisiz edi.

Keıinirek habarsyz ketken eki kenshiniń tabylǵany habarlandy.

Keıinirek shahtada japa shekkenderdiń sany 8 adamǵa jetkeni habarlandy.

Qaraǵandy oblysyndaǵy shahtadaǵy órtke baılanysty qylmystyq is qozǵaldy.