«Qazaqstan» shahtasy qasaqana órtelgeni jaıly aqparat - feık

ASTANA. QazAqparat – Keıbir aqparat agenttikteri men áleýmettik jelilerde Qaraǵandy oblysynyń polıtsııa departamentine silteme jasaı otyryp «Qazaqstan» shahtasy qasaqana órteldi degen málimet tarady. Qaraǵandy oblysy PD baspasóz qyzmeti bul aqparatty joqqa shyǵardy, dep habarlaıdy QazAqparat.

Qazirgi kezde tıisti tergeý amaldary júrgizilip jatyr, órttiń sebebin anyqtaıtyn saraptamalar taǵaıyndaldy.

«Oblys turǵyndarynan yqtımal qaýeset pen arandatýshylyqqa berilmeýin, tek resmı aqparatqa júginýin suraımyz» dep eskertti vedomstvodan.

Eske sala keteıik, QR Qylmystyq kodeksiniń 274-babyna sáıkes kórineý jalǵan aqparat taratqany úshin qylmystyq jaýapkershilik bar.

Eske salsaq, 17 tamyz kúni Qaraǵandy oblysyndaǵy «Qazaqstan» shahtasynda órt tutandy.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

Shahtanyń astynda qalyp qoıǵan bes kenshiniń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatyr.

Eńbek jáne halyqty áleýmettik qorǵaý mınıstrligi Eńbek jáne áleýmettik qorǵaý komıtetiniń tóraǵasy Tólegen Ospanqulov málim etkendeı, «Qazaqstan» shahtasyndaǵy apat úshin jaýapty tulǵa 7 jylǵa deıin túrmege qamalýy múmkin.

Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.