«Qazaqstan» shahtasyndaǵy apatqa kinálilerge qatysty sot úkimi shyqty
QARAǴANDY. KAZINFORM - Qaraǵandy oblysy Shahtınsk qalalyq soty «Qazaqstan» shahtasyndaǵy órtten bes kenshiniń qaza tabý faktisi boıynsha isti qarap, sot úkimin shyǵardy.
Tórt aıyptalýshy 4 jylǵa bas bostandyǵynan aıyryldy. Sotqa deıingi tergep-tekserý organy qaıǵyly oqıǵaǵa jaýapty dep tanylǵan tórt qyzmetkerdi QR QK 277-babynyń 3-bóligi boıynsha abaısyzda eki nemese odan da kóp adamnyń ólimine ákep soqqan Taý-ken nemese qurylys jumystaryn júrgizýdiń qaýipsizdik qaǵıdalaryn buzdy dep aıyptaǵan bolatyn.
Tergeý barysynda birneshe ereje buzýshylyq anyqtaldy.
– Jol berilgen buzýshylyqtardyń saldarynan 2023 jylǵy 17 tamyzda jóndeý aýysymynda «Qazaqstan» shahtasynyń kómir konveıerlik eńisinde órt boldy. Órt saldarynan bes kenshi qaza taýyp, on jeti kenshige densaýlyǵyna ortasha jáne aýyr zııan keltirdi, - dep málimdelgen Shahtınsk qalalyq sotynyń habarlamasynda.
Atalǵan is boıynsha prokýror Qylmystyq kodekstiń 277-babynyń 3-bóliginde kózdelgen qylmystyq quqyq buzýshylyq jasaǵany úshin sottalýshylardy kináli dep tanyp, 4 jylǵa bas bostandyǵynan aıyrý jazasyn taǵaıyndaýdy surady.
– QK-niń 277-babynyń 3-bóliginde kózdelgen qylmys abaısyzda ortasha aýyrlyqtaǵy qylmys bolyp tabylady. Sanktsııa 3 jyldan 8 jylǵa deıin bas bostandyǵynan aıyrýdy qarastyrady. QK-niń 55-babyna sáıkes jeńildetetin mán-jaı bolǵan jáne aýyrlatatyn mán-jaılar bolmaǵan kezde jaza maksımaldy merzimnen½, ıaǵnı 4 jyldan aspaýy tıis. Zańnyń bul talaby sot úshin mindetti bolyp tabylady. G., M., T., G. sottalýshylarynyń jas balalary bar, bul QK-niń 53-babyna sáıkes jeńildetetin mán-jaı dep tanylady. ıAǵnı, olar úshin jaza 4 jyldan aspaýy kerek. Sottalýshylar buryn sottalmady, jumys orny boıynsha oń sıpattalady. Prokýror aıyptaý aktisinde aýyrlatatyn mán-jaılardyń joqtyǵy týraly jazdy. Joǵaryda aıtylǵandardy eskere otyryp, sot G., M., T., G. 4 jylǵa bas bostandyǵynan aıyrý jazasyn taǵaıyndady, - dep sot óz úkimin shyǵardy.
Sot úkimi zańdy kúshine engen joq.
Eske salaıyq, qaıǵyly oqıǵa 2023 jyldyń 17 tamyzynda bolǵan. Apat bolǵan kezde jer astynda 227 shahter bolǵan, olardyń ishinde 222 shahter jer betine shyǵarylyp, bes adam qaza bolǵan edi.