«Qazaqstan» shahtasynda órt eki aıdan beri sóndirilip jatyr – Mınıstr túsinik berdi
Tótenshe jaǵdaılar mınıstri Syrym Sháriphanov órt shyqqan «Qazaqstan» shahtasyndaǵy jaǵdaı týraly aıtyp berdi, dep habarlaıdy Kazinform.
«Shahtalardaǵy órtti sóndirý – erekshe protsess. Ondaǵy órt konveıer taspasynyń órtenýinen týyndaǵan, ot jalyny taý jynystarynyń qabattaryna ótip ketken. Mundaı órtterdi sóndirý olardyń tuıyqtalýy men ottegini shekteý arqyly júrgiziledi. Osyǵan baılanysty arnaıy gıps eritindisinen jasalǵan kedergiler ornatylyp jatyr. Olardyń qalyńdyǵy 1-3 metrge deıin jetedi», – dedi Syrym Sháriphanov Ortalyq kommýnıkatsııalar qyzmetinde.
Aıtýynsha, bul kedergiler jarylystardan da qorǵaýy kerek.
«Sondyqtan shahtada osyndaı 25 bóget salyndy. Onda temperatýra men gazdyń deńgeıin ólsheý úshin arnaıy lıýkter jasalady. Qazirgi ýaqytta bul jumys jalǵasýda. Osylaısha órtti sóndirý uzaq ýaqytty alady. Ol bir aıdan bir jylǵa deıin sozylýy múmkin. Sondyqtan qazir kútý kerek. Mysal keltirer bolsam, jaqynda bógetterdiń biri tekserildi, onda temperatýra joǵary bolyp, tútin baıqalǵan, sondyqtan áli de kútý qajet», – dep atap ótti mınıstr.
Eske salaıyq, Qaraǵandy oblysyndaǵy «Qazaqstan» shahtasynda órt 17 tamyz kúni shyqqan bolatyn.
Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.
Shahtanyń astynda qalyp qoıǵan bes kenshiniń denesi tabyldy.
18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.
Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.
18 qyrkúıekte QR TJ mınıstri Syrym Sháriphanov úkimettik komıssııanyń tergeý qorytyndysyn jarııalady. Saraptama qorytyndysy boıynsha jumys berýshi 100% kináli dep tanyldy
Al 11 qazan kúni atalǵan apat bolǵan jerde jumystar júrgizip jatqan 106 jumysshy shuǵyl túrde evakýatsııalandy. Buǵan oqıǵa ornynda temperatýranyń shamadan tys kóterilýi sebep boldy.
