«Qazaqstan» shahtasynan 106 adam shuǵyl evakýatsııalandy

«Qazaqstan» shahtasynda 17 tamyzda bolǵan órt ornynda jumystar júrgizip jatqan jumysshylar búgin shuǵyl túrde jer betine kóterildi. Evakýatsııa jarııalaýǵa oqıǵa ornynda temperatýranyń shamadan tys kóterilýi sebep boldy, dep habarlaıdy Kazinform.

«2023 jylǵy 17 tamyzda «Qazaqstan» kenishinde bolǵan apattan keıin apatty aımaqqa (D6 qabatynyń kómir eńisi) irgeles jatqan eski qazbalarǵa jáne bógetshelerge tekserý júrgizilip jatqan.

2003 jyly salynǵan №S14 bógetsheni tekserý barysynda jańa oqshaýlaǵysh bógetsheni ornatý sheshimi qabyldandy.

11 qazanda jańa oqshaýlaǵysh bógetsheniń qurylysyna daıyndyq boıynsha tehnıkalyq jumystardy júrgizý kezinde Kásibı áskerılendirilgen avarııalyq-qutqarý qyzmetiniń (KÁAQQ) sarbazdary massanyń qyzyp jatqanyn anyqtady. Ol eski bógetsheniń aýzynan oqshaýlanǵan keńistikten 50 metr jerde ornalasqan.

Atalǵan avarııa týraly habarlanǵan boıda tótenshe jaǵdaıdy joıý jóninde jospar engizildi.

Shahtada 106 adam boldy. Saǵat 13:50-de barlyq jumysshylar jer betine shyǵaryldy. Zardap shekkender joq. Tekserý júrgizý úshin shahtaǵa KÁAQQ-niń qosymsha 2 bólimshesi jetti», – dep habarlady ArselorMıttal Temirtaý AQ baspasóz qyzmetinen.

Eske salaıyq, Qaraǵandy oblysyndaǵy «Qazaqstan» shahtasynda órt 17 tamyz kúni shyqqan bolatyn.

Apat kezinde jer astynda 227 kenshi boldy. 222 adamdy jer betine jedel kóterý múmkin boldy, segizi zardap shekti.

Shahtanyń astynda qalyp qoıǵan bes kenshiniń denesi tabyldy.

18 tamyzdaǵy jaǵdaı boıynsha medıtsına mekemelerinde órtten zardap shekken 11 kenshi em qabyldap jatty.

Prezıdent Qasym-Jomart Toqaev órt sebebin anyqtaý úshin jan-jaqty tergeý júrgizýdi tapsyrdy.

18 qyrkúıekte QR TJ mınıstri Syrym Sháriphanov úkimettik komıssııanyń tergeý qorytyndysyn jarııalady. Saraptama qorytyndysy boıynsha jumys berýshi 100% kináli dep tanyldy