Qazaqstan shahmatshylary álem chempıonatynyń jartylaı fınalyna shyqty

ASTANA. QazAqparat - Shahmattan Qazaqstan áıelder quramasy komandalyq álem chempıonatynyń jartylaı fınalyna shyqty, dep habarlaıdy QazAqparat tilshisi.

Dúbirli doda Polshanyń Bydgoş qalasynda bıyl toǵyzynshy márte jalaýyn kóterdi.

Pavel Kotsýr baptaıtyn el quramasy bul joly Germanııany 3:1 esebimen jeńip, jartylaı fınalǵa joldama aldy.

Saıys barysynda aldymen el quramasynan Alýa Nurmanova sátti oıyn kórsetti. Ol qarsylasy Djozefına Haınemanndy qapy qaldyrdy. Odan keıin Bıbisara Asaýbaeva Elızabet Pattstiń osal tusyn tapty. Al jas shahmatshy Ámına Qaıyrbekovanyń jeńisi Qazaqstandy jartylaı fınalǵa shyǵaryp, qorytyndy esepti bekitti.

Endi el quramasy jartylaı fınalda Frantsııamen kezdesedi.

Qazaqstan quramasy toptyq kezeńde 4 jeńiske qol jetkizip, sońǵy týrda Grýzııamen teń túsken edi.