Qazaqstan shahmatshylary Olımpıadada úzdik úshtikke kóterildi
ASTANA. KAZINFORM – Samarqandta ótip jatqan 46-shy shahmat Olımpıadasynyń toǵyzynshy týrynda Qazaqstan áıelder quramasy Mońǵolııamen teń túsip, jalpy esepte úshinshi orynda kele jatyr, dep habarlaıdy Sportty damytý dırektsııasy.
Qazaqstandyq shahmatshylar osy jarystyń basty sensatsııalarynyń biri sanalyp kele jatqan Mońǵolııa quramasymen kezdesti.
Aldymen úshinshi taqtada Merýert Kamalıdenova Hıshıgbaatar Baıasgalanǵa jol berdi. Artynsha Bıbisara Asaýbaeva Mýngýnzýl Bat-Erdeneni jeńip, esepti teńestirdi.
Odan keıin Zarına Nurǵalıeva tájirıbeli, 38 jastaǵy Bathýıagıın Mongontýýlǵa ese jiberdi. Sheshýshi partııa ekinshi taqtada ótip, Alýa Nurman Mýnhzýl Týrmýnhıındi jeńdi. Osylaısha Qazaqstan men Mońǵolııa arasyndaǵy match 2:2 esebimen aıaqtaldy.
– Qazaqstan áıelder quramasy toǵyz týrdan keıin 15 upaı jınap, týrnır kestesinde úshinshi orynda keledi. Komanda alty kezdesýde jeńiske jetip, úsh matchty teń aıaqtady, – dep habarlady Sportty damytý dırektsııasy.
Áıelder arasynda Olımpıadaǵa 189 komanda qatysyp jatyr. Toǵyz týr qorytyndysynda Qytaı quramasy 17 upaımen kósh bastap tur. Úndistan 15 upaımen ekinshi, Qazaqstan 15 upaımen úshinshi, Mońǵolııa da 15 upaımen tórtinshi orynda. Taǵy alty komandada 14 upaıdan bar.
Erler arasyndaǵy básekede Qazaqstan quramasy bastapqy reıtıngte 16-orynda turǵan Polshamen 2:2 esebimen teń tústi.
Denıs Mahnev ıAn-Kshıshtof Dýdamen, Saýat Nurǵalıev Shımon Gýmýlıarzben teń oınady. Danıal Sapenov Jan Malekke ese jiberse, Aldııar Ańsat ıAkýb Zeemanndy jeńdi.
205 komanda qatysyp jatqan Open sanatynda Ózbekstan 16 upaımen kósh bastap tur. Úndistan men Ózbekstannyń ekinshi quramasynda 15 upaıdan bar. Armenııa da 15 upaı jınaǵan. Qazaqstan quramasy 12 upaımen 33-orynda keledi.
10-týr oıyndary erteń ótedi. 11 týrdan turatyn shahmat Olımpıadasy 27 qyrkúıekte máresine jetedi.
Aıta keteıik, buǵan deıin shahmat Olımpıadasynda Qazaqstan altynshy jeńisine qol jetkizgeni habarlandy.
