Qazaqstan shahmat federatsııasy Bıbisara Asaýbaevanyń RF quramasyna aýysyp ketýine qatysty pikir bildirdi

«Men aldymen sportshylardyń, sonyń ishinde B.Asaýbaevanyń qalaı qarjylandyrylǵandyǵynan bastaǵym keledi. Negizgi qarjylandyrýdy sportshylar QR Mádenıet jáne aqparat mınıstrliginen «Ulttyq shtattyq komanda jáne sporttyq rezerv dırektsııasy» arqyly alyp otyrady, olarǵa demeýshiler de kómek qolyn sozady. 2013-2015 jyldary aralyǵynda B.Asaýbaeva Astanada ornalasqan Astana ákimdigine qarasty «S.H.Omarov atyndaǵy shahmat klýbynan» alyp kelgen. Shahmat klýbynan QShF atyna túsken hatta atap kórsetilgenindeı, úsh jyldyń ishinde jas shahmatshyǵa klýb 7 mln. 608 myń 436 teńge bólgen. L.Tańjaryqova 2012 jyldyń qańtarynan beri «Ulttyq shtattyq komanda jáne sporttyq rezerv dırektsııasynda» shahmattan bapker bolyp qyzmet isteıdi jáne  QR Mádenıet jáne aqparat mınıstrligi Sport jáne dene shynyqtyrý isteri komıtetinen aı saıyn qarjylandyrylady (jalaqy alady). Bul týraly QShF atyna mınıstrlik tarapynan kelgen resmı hat rastap otyr. Qazaqstannyń shahmat federatsııasy shahmatshylardy qosymsha qarjy kózi bolyp qana qyzmet etedi», - dedi Grışenko.

Onyń sózine qaraǵanda, 2016 jyly 12 aqpan kúni QShF atyna ıýnıorlar arasynda 4 dúrkin álem chempıony Bıbisara Asaýbaevanyń menedjeri ári anasy Lıana Tańjaryqovadan hat kelgen. Ol hatta sportshynyń anasy Bıbisaraǵa tólenetin aı saıynǵy shákirtaqyny 33 myń teńgeden 55 myń teńgege joǵarylatýdy suraǵan. L.Tańjaryqova hat sońynda federatsııanyń mundaı qarym-qatynasy jalǵasa beretin bolsa, federatsııadan ketetindigin málim etti.

Federatsııa óz kezeginde, B.Asaýbaeva bolashaǵynan úmit kúttiretin sportshy bolǵandyqtan, onyń talanty men eńbegin eskere otyryp, sportshyǵa halyqaralyq týrnırlerde qosymsha qarjylyq kómek qarastyrýdy durys dep tapty.

«Ol týraly men L.Tańjaryqovaǵa habarlasyp, aıtqan bolatynmyn jáne onyń bul jańalyqqa oń kózqaras tanytqany anyq edi. Sodan keıin L.Tańjaryqovadan QShF atyna eshqandaı ótinishter kelgen joq. Osylaısha bul másele sheshimin tapqandaı kóringen», - deıdi QShF atqarýshy dırektory.

Degenmen 30 mamyr kúni L.Tańjaryqovadan  qyzynyń «basqa federatsııaǵa aýysýyna baılanysty» QShF qatarynan shyǵarý týraly ótinishi kelip tústi. Keıin anyqtalǵanyndaı, B.Asaýbaeva Reseıdiń shahmat federatsııasyna qabyldanǵan.

«FIDE erejelerine sáıkes, sportshynyń federatsııadan shyǵý týraly ótinishi túskennen keıin, 3 aıdan soń shahmatshy avtomatty túrde ózge federatsııaǵa qabyldana beredi. Atalǵan merzim aıaqtalmas buryn, 19 tamyzda bizdiń federatsııa onyń qyzy basqa federatsııaǵa ótý týraly sheshimin rastaıtyndyǵyn bilý maqsatynda L.Tańjaryqovaǵa saýal joldady. Alaıda eshqandaı jaýap kelmedi. Osyǵan oraı, B.Asaýbaeva 26 tamyzdan bastap, týrnırlerde Reseıdiń shahmat federatsııasynyń atynan shyǵatyn sportshy dep tanyldy», - delingen Grışenkonyń habarlamasynda.