Qazaqstan shaǵyn ken oryndarynyń áleýetin ashýda jańa tetikti qoldanady
ASTANA. KAZINFORM — Atom elektr stantsııasynyń qurylysy — taza energııaǵa jáne energetıkalyq táýelsizdikke qaraı jasalǵan strategııalyq qadam. Bul týraly Kazakhstan Energy Week — 2025 jáne XVI Eýrazııalyq KAZENERGY forýmynda Úkimet basshysy Oljas Bektenov málim etti.
— Búginde ómirlik qajettilikke aınalǵan tsıfrlyq kún tártibine jeke toqtalǵym keledi. Meniń oıymsha, bul bizdiń óńirlik deńgeıdegi artyqshylyǵymyz sanalady. Energetıka salasynda jasandy ıntellektiniń róli orasan zor. Ol jańa barlaý ádisterine, sondaı-aq óndirý, tasymaldaý jáne óńdeý úderisterin ońtaılandyrýǵa múmkindik beredi. Munaı-gaz salasynda munaı ónimderiniń qozǵalysyn qadaǵalaıtyn OilTrack platformasy, jer qoınaýyn paıdalanýdy avtomattandyrýǵa arnalǵan «Tsıfrlyq kelisimshart» júıesi jumys isteıdi. Al «Munaı men munaı ónimderin tsıfrlyq bólý» júıesi baqylaý men ashyqtyqty qamtamasyz etedi. Biz salany tehnologııalyq jańǵyrtý isin jedeldetip jatyrmyz. Munaı óndirýdi arttyrý ádisteri, barlaý jáne óndirýdi tsıfrlandyrý, sondaı-aq derekterdi taldaýda jasandy ıntellektini paıdalaný tek qoldanystaǵy ken oryndaryndaǵy óndiristi ulǵaıtýǵa ǵana emes, sonymen birge shaǵyn jáne orta ken oryndarynyń áleýetin ashýǵa da múmkindik beredi, — dedi Oljas Bektenov.
Onyń aıtýynsha, arnaıy qurylǵan Jasandy ıntellekt jáne tsıfrlyq damý mınıstrligi ınnovatsııa salasyndaǵy strategııalyq baǵdarymyzdy aıqyndaıdy, sondaı-aq tsıfrlyq sheshimderdi jedel engizýdi qamtamasyz etedi.
— Sonymen qatar energııaǵa degen suranystyń artýy bizden qýat kózderiniń aýqymdy kólemin óndirýdi talap etedi. Osyǵan baılanysty sırek jer metaldary men ýran keniniń mańyzy arta túsedi. Bul rette Qazaqstan álem elderine senimdi seriktes bolýǵa daıyn. Atom elektr stantsııasynyń qurylysy — taza energııaǵa jáne energetıkalyq táýelsizdikke qaraı jasalǵan strategııalyq qadam, — dedi Úkimet basshysy.
Buǵan deıin Oljas Bektenov Qazaqstan Ortalyq Azııadaǵy eń iri polımer óndirýshi elge aınalatynyn aıtty.