Qazaqstan shabandozdary Eýrazııa Lıgasynyń jeńimpazy atandy
ASTANA. KAZINFORM – Astanada úsh kúndik halyqaralyq at sporty jarystary óz máresine jetti. Konkýrdan Álem Kýbogynyń kezeńin jáne Atpen mánerlep júrýden baqtalasýǵa alty elden alpys shabandoz kelgen. Jalpy komandalyq esepte Qazaqstan quramasy birinshi oryndy ıelendi.
«Arǵymaq» at sport kesheninde konkýr boıynsha Eýrazııa Lıgasynyń Álem Kýbogy kezeńi (FEI CSI 1*-W) jáne Atpen mánerlep júrýden halyqaralyq týrnır (FEI CDI 1*) aıaqtaldy. Jalpy júlde qory 24 myń AQSh dollaryn qurady.
Konkýrdan Eýrazııa Lıgasynyń Álem Kýbogy kezeńi Astanada 10 jyldan keıin alǵash ret ótkizilip otyr.
Sonymen qatar, elorda tarıhynda tuńǵysh ret atpen mánerlep júrýden halyqaralyq týrnır uıymdastyryldy. Bul Qazaqstanda osy sport túriniń damýyna tyń serpin beretin mańyzdy qadam boldy. Soǵan qaramastan halyqaralyq tóreshiler bizdiń eldiń uıymdastyrý deńgeıi men sportshylardyń daıyndyǵyn joǵary baǵalady.
− Qazaqstandyq uıymdastyrýshylarǵa daıyndyqqa nebári 1,5 aı berildi. Soǵan qaramastan barlyq sportshylar Astanadaǵy jarystyń óte joǵary deńgeıde ótkenin aıtýda. Sportshy jalǵyz kelmeıdi, onymen birge sáıgúlik keledi. Qazaqstan jalǵa alatyn attarmen de qamtamasyz etti. Olardy jem-shóppen, veterınarlyq qyzmetpen tolyq qamtamasyz etý kerek boldy. Sondyqtan bizdiń tańdanysymyz da, joǵary baǵamyz da oryndy. Qazaqstan quramasyn komandalyq jarysta birinshi oryn alýymen quttyqtaımyn. Bul uzaq ýaqyttan keıingi alǵashqy jeńis, − dedi Halyqaralyq at sporty federatsııasy bıýrosynyń múshesi, Eýrazııalyq at sporty qaýymdastyǵynyń prezıdenti, Reseı at sporty federatsııasynyń prezıdenti Marına Sechına.
Bizdiń eldiń shabandozdary jalpy komandalyq esepte úzdik shyǵyp jeńimpaz atandy.
Al jekeleı saıystarda Qyrǵyzstan men Ózbekstan sportshylary basym tústi. Qazaqstandyq komandadan Daıana Ońaeva, Oleg Sokolenko, Nurıla Turysbekova erekshe kózge tústi, júldeli oryndardy ıelendi.
Qazaq sportshylarynyń áleýetin elimizdiń bas bapkeri de rastaıdy jáne halyqaralyq jarystarǵa kóbirek qatystyryp, tájirıbe jınatý keregin aıtty.
− Álemdik reıtıngke jaqsy upaı jınaý úshin bizdiń sportshylar únemi Eýropada jarysqa qatysýy kerek. Bizde óte jas sportgshylarymyzdyń deńgeıi óte joǵary, olar jaqsy nátıje kórsetip jatyr. Endi 2026 jyly Germanııayń Ahen qalasynda Álem chempıonaty ótedi. Sol jaqqa joldama jeńip alamyz degen úmittemiz. Áli aldymyzda reıtıngtik jarystar kóp, 2026 jyly Japonıda Azııa oıyndary ótedi. Sol jaqqa komandany aparý jospary bar, − At sportynan QR qurama komandasynyń bas bapkeri Áset Tolqynbekov.
Aıta keteıik, Astanada ótken saıys - Eýrazııa lıgasynyń tórtinshi kezeńi. Buǵan deıingi jarystar Ózbekstan men Qyrǵyzstanda ótse, 5-6 týr – Grýzııada, al 7-týr Armenııada ótpek. Aqtyq syn – Iranda uıymdastyrylady. Sol saıysta konkýrdan Álem Kýbogynyń fınalyna lıtsenzııa oınalady.
− 1999 jyly Qazaqstan, Qyrǵyzstan jáne Ózbekstannyń úsh federatsııasy arasynda Eýrazııalyq lıga quryldy. Sol ýaqyttan beri biz kýbok jarystaryn ótkizip kelemiz, bul – shabandozdarymyzdyń álem kýbogynyń fınalyna joldama alýyna jáne irikteýden ótýine múmkindik beredi. Álem kýbogynyń fınaly óz kezeginde álem chempıonatyna jol ashatyn mańyzdy kezeń bolyp sanalady. Sol sebepti biz Eýrazııalyq lıgamyz aıasynda jarys kezeńderin ótkizip kelemiz. Men ózim at sportymen aınalysqanmyn, sondyqtan Astanadaǵy uıymdastyrý deńgeıin joǵary baǵalaımyn. Keremet at qora, joǵary deńgeıdegi konkýr alańy, sapaly jattyǵý alańy – munyń bári tamasha atmosfera syılap, attardyń jaraqat qaýpin azaıtyp, múmkindigin tolyq kórsetýge jaǵdaı jasaıdy. Alda bizdi kelesi kezeńder kútip tur. Bul jarystardyń barlyǵyn 2026 jyly Japonııada ótetin Azııa oıyndaryna daıyndyqtyń bir bóligi retinde qarastyryp otyrmyz, − dedi Qyrǵyzstan at sporty federatsııasynyń prezıdenti Sadyr Mamytov.
Óz kezeginde QR At sporty federatsııasynyń prezıdenti Rýstam Baıalıev mundaı jarystar ınfraqurylymdy damytýǵa, sporttyq týrızmniń ósýine, jastardyń nazaryn sportqa aýdarýǵa, eń bastysy – elimizde myqty, básekege qabiletti at sporty mektebin qalyptastyrýǵa yqpal etetinin aıtýda.
− Qazaqstan úshin at sporty – jaı ǵana jarys túri emes, ulttyq muramyzdyń bir bóligi ári ony álemdik arenaǵa shyǵarýdyń mańyzdy qadamy. Bizdiń maqsatymyz – Qazaqstannyń halyqaralyq saıystardaǵy pozıtsııasyn nyǵaıtý, jas talanttardyń ósýine jaǵdaı jasaý, jańa sportshylar býynyn tartý jáne úsh saıys, kedergilerdi eńserý, atpen mánerlep júrý jáne basqa da túrlerin keńinen nasıhattaý, − dedi R. Baıalıev.
Aıta keteıik, konkýr – tulpardyń jáne shabandozdyń kedergilerden ótý qabiletin anyqtaıtyn olımpıadalyq sport túri. Maqsat – qashyqtyqty qateliksiz ári múmkindiginshe qysqa ýaqyt ishinde eńserý.
Atpen mánerlep júrý – at sportynyń joǵary deńgeıi, munda shabandoz ben at arnaıy arenada dáldikpen jáne úılesimdilikpen túrli qımyldardy oryndaıdy.