Qazaqstan seısmologtary kezekti jer silkinisin tirkedi
NUR-SULTAN. QazAqparat – QR Bilim jáne ǵylym mınıstrligine qarasty «Seısmologııalyq tájirıbe-ádistemelik ekspedıtsııasy» MM-niń seısmıkalyq stansalar jelisi 20 qańtar kúni Almaty ýaqytymen 13 saǵat 33 mınýt 32 sekýndta jer silkinisin tirkedi, dep habarlaıdy QazAqparat.
Zilzala oshaǵy Almaty qalasynan 355 shaqyrym qashyqtyqta Qytaı aýmaǵynda ornalasty.
«Energetıkalyq sanaty – 9,7. MPV magnıtýdasy – 4,2. Tereńdigi – 5 shaqyrym. MSK-64 baǵany boıynsha sezilý týraly málimetter joq», - delingen aqparatta.
Eske salaıyq, bul sońǵy eki táýlikte Qytaı aýmaǵynda tirkelgen besinshi jer silkinisi. Alǵashqysy 19 qańtar kúni saǵat 06. 04-te, ekinshi zilzala 19 qańtar saǵat 21:27-de boldy. 19 qańtarda saǵat 19.27-de bolǵan jer silkinisiniń dúmpýi Qazaqstan aýmaǵyna jetti. Ony Almaty turǵyndary 3-4 ball qýatymen sezindi. Zardap shekkender jáne qıraǵan ǵımarattar týraly málimetter túsken joq. Búgin, 20 qańtar kúni saǵat 09.17-de QR BǴM-niń seısmıkalyq stansalary Almaty qalasynan 356 shaqyrym qashyqtyqta Qytaı aýmaǵynda taǵy bir dúmpýdiń bolǵanyn anyqtady.
Sondaı-aq aıta keteıik, 20 qańtar kúni Almaty oblysynda eki jer silkinisi tirkeldi. Alǵashqysy saǵat 02-57-te boldy. Biraq turǵyndar dúmpýdi sezinbedi. Ekinshisi saǵat 11.31-de Almaty oblysynyń Tekeli qalasy men Rýdnıchnyı aýylynyń arasynda boldy. Ony Tekeli qalasynyń turǵyndary 3-4 ball, Taldyqorǵan qalasynyń turǵyndary 3 ball qýatymen sezindi.
