Qazaqstan Serbııamen qarý-jaraq pen áskerı tehnıka úlgilerin birlesip synamaq
ASTANA. KAZINFORM – Búgin Quryltaı otyrysynda «Qazaqstan men Serbııa Úkimetteri arasyndaǵy áskerı-tehnıkalyq yntymaqtastyq týraly kelisimdi ratıfıkatsııalaý týraly» zań jobasy birinshi oqylymda maquldandy.
Qujatty tanystyrǵan Qorǵanys mınıstriniń orynbasary Shaıh-Hasan Jazyqbaevtyń aıtýynsha, kelisimniń maqsaty - taraptar arasynda teńdik qaǵıdaty negizinde áskerı-tehnıkalyq yntymaqtastyqty ornatý jáne ári qaraı ózara tıimdi damytý.
- Kelisimmen áskerı maqsattaǵy ónimderdi ózara jetkizýdi júzege asyrý, qarý-jaraq pen áskerı tehnıkaǵa qyzmet kórsetý jáne jóndeý jónindegi jumystardy oryndaý, birlesken ǵylymı-zertteýler men tájirıbelik-konstrýktorlyq jumystar júrgizý, tehnologııa transferleri, qarý-jaraq pen áskerı tehnıka úlgilerin birlesip synaýdy júrgizý sııaqty yntymaqtastyqtyń negizgi baǵyttary kózdelgen. Qarý-jaraq pen áskerı tehnıka úlgilerin birlesip synaýdy júrgizý kezinde áskerı ınfraqurylym nysandaryn paıdalaný múmkin bolǵandyqtan, kelisim ratıfıkatsııalaýǵa jatady, - dedi mınıstr orynbasary.
Onyń málimetinshe, Qazaqstan tarapynan kelisimdi iske asyrý boıynsha Qorǵanys mınıstrligi men Ónerkásip jáne qurylys mınıstrligi ýákiletti organdar bolady. Kelisim aıasynda yntymaqtastyqty júzege asyrý úshin taraptarmen áskerı-tehnıkalyq yntymaqtastyq boıynsha birlesken jumys toby qurylady.
- Zań jobasy respýblıkalyq bıýdjetten qosymsha qarjy bólýdi qajet etpeıdi jáne teris áleýmettik-ekonomıkalyq jáne quqyqtyq saldarǵa ákelmeıdi. Kelisimdi ratıfıkatsııalaý Qazaqstan Respýblıkasynyń qorǵanys-ónerkásiptik kesheni men áskerı-tehnıkalyq yntymaqtastyqtyń damýyna qosymsha serpin bolady, - dedi Shaıh-Hasan Jazyqbaev.
Aıta keteıik, Quryltaı otyrysynda depýtattar birqatar zań jobasyn talqylap jatyr.
