Qazaqstan — senimdi odaqtasymyz - Vladımır Pýtın

ASTANA. KAZINFORM — Qazaqstan — bizdiń strategııalyq seriktesimiz jáne senimdi odaqtasymyz. Bul týraly Aqordada elimizge memlekettik saparmen kelgen Reseı Prezıdenti Vladımır Pýtın Memleket basshysy Qasym-Jomart Toqaevpen keńeıtilgen quramdaǵy kelissóz barysynda aıtty.

«Qasym-Jomart Kemeluly, shaqyrǵanyńyz úshin, osyndaı jyly qabyldaǵanyńyz úshin alǵys aıtqym keledi. Shynynda da, Qazaqstan – bizdiń strategııalyq seriktesimiz jáne senimdi odaqtasymyz. Shaǵyn quramdaǵy kelissóz barysynda ekijaqty baılanystar aıasynda týyndaıtyn problemalarǵa nazar aýdardyq. Keıbir máseleler, siz aıtqandaı, bizdiń tarapymyzdan, Reseıden nazar aýdarýdy talap etedi jáne siz Reseı tarapynan, reseılik seriktesterden belgili bir sheshimderdi kútesiz», — dedi Vladımır Pýtın.

Sonymen qatar ol Reseı tarapynan da suraqtar týyndaıtyndyǵyn atap ótti. 

«Eń bastysy, barlyq saýaldyń jaýabyn tabýǵa ortaq umtylys bar. Men eki el arasynda sheshilmeıtin túıtkil joq ekenin jaqsy bilemin. Al mundaı nıettestik úlken jetistikterge ulasady. Sizdiń basshylyǵyńyzben Qazaqstan tolaıym tabystarǵa qol jetkizdi. Biz buǵan qýanyshtymyz. Óıtkeni ekijaqty yntymaqtastyqtyń aýqymy artyp keledi. Qazirgideı qıyndyqtarǵa qaramastan, yqpaldastyǵymyz keńeıýde ári qos tarapqa da tıimdi», — dedi Reseı basshysy.

V. Pýtın búgin ónerkásip pen qarjydan bólek, ózge de ózekti máseleler talqylanǵanyn atap ótti. Sondaı-aq erteń elordada ótetin UQShU aıasynda qaýipsizdik máselesi qozǵalatyndyǵyna nazar aýdartty.