Qazaqstan Senaty men Shvetsııa Rıksdagynyń vıtse-spıkerleri parlamentaralyq ózara is-qımyldyń keleshegin talqylady
NUR-SULTAN. QazAqparat - QR Parlamenti Senatynyń jáne Shvetsııa Koroldigi Rıksdagynyń vıtse-spıkerleri parlamentaralyq ózara is-qımyldyń keleshegi men halyqaralyq kún tártibindegi ózekti máselelerdi talqylady, dep habarlaıdy QazAqparat Senattyń baspasóz qyzmetine silteme jasap.
Senat tóraǵasynyń orynbasary Asqar Shákirov shved áriptesi Margaret Sederfeltti Qazaqstandaǵy prezıdenttik saıası reformalar jónindegi zańdardyń úsh toptamasymen, onyń ishinde saılaýǵa, beıbit jınalystarǵa, qoǵamdyq baqylaýǵa, qylmystyq sot tóreligin jetildirýge, ulttyq Ombýdsmenniń mártebesin nyǵaıtýǵa jáne ókilettigin keńeıtýge qatysty zańnamamen tanystyrdy.
Rıksdag tóraǵasynyń orynbasary EQYU men onyń Parlamenttik Assambleıasynda belsendi múshe retindegi Qazaqstannyń oń rólin, onyń halyqaralyq qatynastardaǵy joǵary áleýeti men bedelin atap ótti
Halyqaralyq kún tártibindegi máselelerdi talqylaý barysynda Aýǵanstanda qalyptasyp otyrǵan jaǵdaıǵa jáne ony retteýdegi álemdik qoǵamdastyqtyń róline erekshe nazar aýdaryldy. Osyǵan baılanysty elimizdiń osy protseske qosqan úlesi atap ótildi.
Taraptar Qazaqstannyń Ortalyq Azııa óńirindegi mańyzdy rólin atap óte kelip, sondaı-aq Sırııadaǵy jaǵdaıdy retteý jónindegi Astana protsesi men Prezıdent Qasym-Jomart Toqaevtyń Ortalyq Azııa memleketteri basshylarynyń kezekti konsýltatıvtik kezdesýi aıasynda shekaralyq qaqtyǵystardy retteý tetigin ázirleý jónindegi bastamasyn eskere otyryp, eldiń bitimgerlik jónindegi oń tájirıbesine toqtaldy.
Áńgime barysynda koronavırýs pandemııasyna qarsy is-qımyl máseleleri týraly pikir almasyldy. Margaret Sederfelt koronavırýspen kúreske oraı Qazaqstanda qabyldanyp jatqan sharalardy, qazaqstandyq QazVac vaktsınasyn ázirleý men Dúnıejúzilik densaýlyq saqtaý uıymynyń «One Health» baǵdarlamasy aıasynda Ortalyq Azııa elderiniń áleýetin arttyrý jónindegi Memleket basshysynyń Qazaqstanda pılottyq jobany iske asyrý týraly usynysyn quptady.
Áńgime kezinde Qazaqstan men Shvetsııanyń zańnamalyq organdary deńgeıindegi ekijaqty jáne kópjaqty sıpattaǵy is-qımylmen qosa ekijaqty yntymaqtastyqty keńeıtý máselelerin talqylaýǵa erekshe mán berildi. Júzdesýshiler elder arasyndaǵy parlamentaralyq, mádenı-gýmanıtarlyq jáne ǵylymı-bilim berý baılanystardy óristetýdi jaqtady.
Kezdesýge Halyqaralyq qatynastar, qorǵanys jáne qaýipsizdik komıtetiniń tóraǵasy Muhtar Qul-Muhammed qatysyp, sóz sóıledi.
