Qazaqstan Senaty Kanada Parlamentimen yntymaqtastyqty óristetýge ázir
ASTANA. QazAqparat - QR Parlament Senatynyń Tóraǵasy Qasym-Jomart Toqaev Kanadanyń general-gýbernatory Jıýlı Paıettpen kezdesti, dep habarlaıdy QR Parlamenti Senatynyń baspasóz qyzmeti.
Tóraǵa J. Paıettiń Qazaqstanǵa sapary ekijaqty yntymaqtastyqqa eleýli túrde serpin beretin mańyzy zor oqıǵa ekenin atap ótti. Q.Toqaev bizdiń elderimizdiń kóptegen ortaq sıpattary bar ekenin, onyń ózi saýda-ekonomıkalyq, mádenı-gýmanıtarlyq, energetıka, aýyl sharýashylyǵy, tehnologııalar, bilim berý jáne aeroǵarysh salalaryndaǵy yntymaqtastyq úshin múmkindikter ashatynyn aıtty.
J. Paıett bortynda kanadalyq astronavty bar ǵarysh kemesi ushqan Baıqońyr ǵarysh aılaǵyna barǵan saparynan alǵan áserimen bólisti jáne Kanada jaǵynyń Qazǵarysh mekemesimen yntymaqtastyq týraly memorandýmǵa qol qoıý nıeti bar ekenin habarlady.
Parlament joǵarǵy Palatasynyń Tóraǵasy Qazaqstannyń saıası júıesindegi Senattyń róli jáne Memleket basshysy N.Nazarbaevtyń bastamasymen júzege asqan saıası jáne áleýmettik-ekonomıkalyq jańǵyrý baǵdarlamalaryn iske asyrýdaǵy depýtattardyń jumysy týraly meımandy habardar etti.
Júzdesýshiler Qazaqstan men Kanada arasyndaǵy parlamentaralyq únqatysýdyń keleshegi týraly pikir almasty. Q.Toqaev eki eldiń zań shyǵarý organdarynyń baılanystaryn damytýǵa Senattyń múddeli ekenin jáne EQYU Parlamenttik Assambleıasy men Parlamentaralyq Odaqta Kanada parlamentshilermen ózara nátıjeli is-qımyldy atap ótti.
Senat basshysy óziniń kanadalyq áriptesine Astanaǵa resmı saparmen kelýge shaqyrýyn joldady. J. Paıett óz kezeginde Qazaqstanmen ekijaqty kún tártibindegi aýqymdy máseleler boıynsha, sondaı-aq kóptarapty yntymaqtastyq aıasyndaǵy baılanystardy damytýǵa Kanadanyń múddeli ekenin naqtylady.
Atap aıtqanda, BUU Qaýipsizdik Keńesine turaqty emes múshe bolyp saılaný jónindegi Ottava naýqany turǵysynda General-gýbernator osy halyqaralyq iri uıymdaǵy joǵary organǵa qatysýyn aıaqtap jatqan Qazaqstannyń tájirıbesine yqylas bildirdi.
Q. Toqaev Astananyń BUU Qaýipsizdik Keńesindegi basymdyqtary, ıadrolyq qarýdy taratpaý jáne jahandyq qaýipsizdik jónindegi Prezıdent N. Nazarbaevtyń bastamalary týraly kanadalyq delegatsııany habardar etti.
Senat Tóraǵasy adamzat ómirindegi kókeıkesti máselelerdi sheshý úshin konfessııalar men saıası kóshbasshylardy bir ústel basynda biriktirgen dúnıejúzindegi ókildi alań bolyp tabylatyn Álemdik jáne dástúrli dinder lıderleriniń VI Seziniń qorytyndylarymen bólisti. Q. Toqaev forým jumysyna ár jyldarda BUU Bas hatshysy, memleketter basshylary, dúnıe júzine tanymal saıasatkerler qatysqanyn, onyń ishinde Kanadanyń burynǵy premer-mınıstri Jan Kreten da bolǵanyn aıtty.
