Qazaqstan senatorlary Máskeý bıliginiń kraýdsorsıng jobalarymen tanysty
Palatanyń baspasóz qyzmetinen málim etkendeı, sapar barysynda Aleksandrov baǵyndaǵy Belgisiz soldat zıratyna gúl shoqtaryn qoıý rásimi ótti. Budan bólek, Senat tóraǵasy «Basqarýdyń jańa tehnologııalary» ortalyǵynda bolyp, «Belsendi azamat», «Bizdiń qala» jobalarymen, memlekettik elektrondyq qyzmettermen jáne Máskeý Úkimetiniń kraýdsorsıng jobalarymen tanysty.
«Jobalar memlekettik organdardyń qala turǵyndarymen keri baılanysyn júzege asyrýǵa: azamattardyń shaǵymdary men pikirlesýine oraı áreket etýge; merııa baǵdarlamalaryna baılanysty qala turǵyndaryna saýalnama men zertteý júrgizýge múmkindik beredi. Onda qazirgi zamanǵy erekshe ІT-tehnologııalar qoldanylady, azamattar keń taralǵan kommýnıkatsııalyq qyzmetterdiń (saıt nemese mobıldik qosymsha arqyly) kómegimen jobany paıdalana alady. Máselen, «Bizdiń qala» portalynyń reglamentine sáıkes problemalardy joıý merzimi 8 kún bolyp otyr», - delingen taratylǵan aqparatta.
«Belsendi azamat» jobasy Máskeýde 2014 jyldan beri jumys isteıdi jáne Máskeý qalasynyń turǵyndarynyń ótinishterin jınaqtaý, aýqymdy saýalnama júrgizý úshin mobıldik qosymsha ári saıt túrinde qyzmet kórsetip keledi. Saýalnama taqyryptarynda qala ómiriniń barlyq salalary qamtylǵan. Sonyń ishinde, jańa metro stantsııasynyń dızaınyn ázirleý jáne memlekettik emhananyń jumys kestesin aýystyrý bar.
«Saýalnama nátıjeleri máskeýlik bıliktiń sheshim qabyldaý barysynda eskeriledi. Jobanyń júzege asýy qalalyq problemalardy talqylaýǵa áleýmettik belsendi jas urpaqty tartýǵa múmkindik berdi. Joba jumys istegen 5 jylda oǵan 2,4 mıllıon turǵyn atsalysty. Senat basshysy «Bizdiń qala» portaly jumys istegen jyldary 3,7 mıllıon máseleniń sheshimin tabýy turǵyn úı-kommýnaldyq sharýashylyq máselelerin retteý júıesin jetildirýdegi múmkindikter men baǵyttardy kórsetip otyrǵanyn atap ótti», - delingen palata málimetinde.
«Azamattardy óz úılerine qyzmet kórsetý men kútip-ustaýdy sandyq turpatta baqylaýǵa belsendi túrde tartý búgingi zamanǵa saı, yńǵaıly ári basqarýǵa tıimdi. Mundaı ádisterdi Parlamentte jatqan turǵyn úı-kommýnaldyq sharýashylyq máseleleri jónindegi zań jobasyn talqylaýda qarastyrýǵa bolady. Halyqpen keri baılanys tájirıbesi qyzyqtyrady. Oılanatyn másele», - dedi Darıǵa Nazarbaeva.
Senat spıkeri búgin sondaı-aq Halyq sharýashylyǵy jetistikteri kórmesinde ornalasqan Qazaq KSR eski pavılonynyń ornynda boı kótergen «Qazaqstan» pavılonynda boldy.
