Qazaqstan senatorlary Aqtóbedegi terrorlyq aktini aıyptady
ASTANA. QazAqparat - 7 maýsymda Qasym-Jomart Toqaevtyń tóraǵalyǵymen ótken Parlamenttiń joǵarǵy palatasy Bıýrosynyń otyrysynda Senat spıkeri palata depýtattarynyń atynan Aqtóbedegi terrorlyq aktiniń saldarynan qaza bolǵandardyń otbasylaryna kóńil aıtyp, zardap shekkenderdiń saýyǵyp ketýine tilektestik bildirdi.
Senatorlar sodyrlardyń arsyzdyǵy men qatigezdigine narazylyqtaryn jetkizip, memleketimizdiń ishki saıası turaqtylyǵyn shaıqaltýdy kózdegen terrorlyq aktilerge jol bermeý qajettigi týraly málimdedi.
Parlamentshiler QR Prezıdenti Nursultan Nazarbaevtyń basshylyǵymen tarıhı turǵydan alǵanda qysqa merzim ishinde Qazaqstan áleýmettik-ekonomıkalyq jáne demokratııalyq damý jolynda barsha halyqaralyq qoǵamdastyq moıyndaǵan jetistikterge qol jetkizip, álemdik arenada bedeldi memleketke aınalǵanyn atap ótti. «Bul elimizdegi kópultty halyqtyń myzǵymas birliginiń arqasynda múmkin boldy. Qasıetti Ramazan aıynyń qarsańynda bolǵan arsyz qylmysty dinmen baılanystyrmaý kerek, bul, shyn máninde, bizdiń azamattarymyzdyń tynyshtyǵy men mamyrajaı ómirine qarsy baǵyttalǵan aram nıetti qaraqshylyqtyń kórinisi»,-delingen depýtattar málimdemesinde.
Senatorlar konstıtýtsııalyq tártipke jáne qazaqstandyq qoǵamdaǵy beıbitshilik pen kelisimge eshkimniń qol suǵýǵa haqysy joq dep sanaıdy, jáne quqyq qorǵaý organdarynyń qaraqshylardyń kózin joıyp, olardy jaýapqa tartý jónindegi áreketterin qoldaıdy.
