Qazaqstan semserlesýshileri U23 Azııa chempıonatyn 11 medalmen aıaqtady
ASTANA. KAZINFORM — Qazaqstan quramasy Bahreınde ótken 23 jasqa deıingi sportshylar arasynda semserlesýden Azııa chempıonatynda 11 medal jeńip aldy.
Ulttyq quramanyń qorjynynda úsh altyn, tórt kúmis jáne tórt qola júlde bar. Osylaısha Qazaqstan jalpykomandalyq esepte ekinshi oryn aldy.
Kırıll Prohodov eki márte jeńis tuǵyrynyń eń bıik satysyna kóterildi. Otandasymyz aldymen shpagadan jekeleı synda chempıon atansa, keıin Mıhaıl Kýzmın, Georgıı Tınnıkov jáne Janarbek Januzaqovpen birge komandalyq jarysta top jardy.
Dılıara Isabekova, Polına Ko, Adema Serikbaı jáne Qaısha Jánibek Qazaqstan quramasyna úshinshi altyn medaldi syılady. Olar komandalyq saıysta qarsylastarynan basym tústi.
Sonymen qatar Qaısha Jánibek pen Dılıara Isabekova jekeleı synda da júldegerler qatarynan kórindi. Qaısha kúmis medal jeńip alsa, Dılıara qola júldege ıe boldy.
Jekeleı syndaǵy taǵy eki júldeni apaly-sińlili Lesovskııler enshiledi. Marııa rapıradan ekinshi oryn alsa, Polına jarysty qola medalmen aıaqtady.
Keıin olar Karolına Fomına jáne Natalıa Zınıakovamen birge komandalyq saıysta kúmis júldeger atandy. Dál osyndaı nátıjege rapıra básekesinde synǵa túsken Ǵalym Nurymov, Tımofeı Semenov, Evgenıı Tokanov jáne Mansur Esteý de qol jetkizdi.
Qazaqstan quramasy komandalyq jarystarda taǵy eki qola medal jeńip aldy. Áıelder arasynda rapıradan Sofııa Aktaeva, Ksenııa Andreeva, Alena Gnoeva jáne Alına Iskanderova úshinshi oryn ıelendi. Al erler arasynda sablıadan Beksultan Ábjal, Qýanysh Erǵashbaı, Erhan Qaraman jáne Qaınazar Nurqatuly qola júldeger atandy.
Aıta ketelik hokkeıden Azııa chempıonatyna qatysatyn Qazaqstan quramasynyń tizimi anyqtalǵan edi.
