Qazaqstan semserlesýden jastar arasyndaǵy Azııa chempıonatynda taǵy eki altyn medal jeńip aldy
ASTANA. KAZINFORM — Qazaqstan quramasy Manamada (Bahreın) ótip jatqan 23 jasqa deıingi sportshylar arasynda Azııa chempıonatynda taǵy eki altyn medal ıelendi.
Shpagada synǵa túsken erler quramasy men sablıadan óner kórsetken áıelder quramasy jeńis tuǵyrynyń birinshi satysyna kóterildi.
Shpagada Qazaqstan namysyn Mıhaıl Kýzmın, Kırıll Prohodov, Georgıı Tınnıkov jáne Janarbek Januzaqov qorǵady. Aqtyq synda otandastarymyz Gonkong quramasynan basym tústi.
Al sablıadan ótken áıelder arasyndaǵy komandalyq básekede Dılıara Isabekova, Polına Ko, Adema Serikbaı jáne Qaısha Jánibek jeńimpaz atandy. Sheshýshi kezdesýde qazaqstandyq sportshylar Gonkong quramasyn utty.
Budan bólek, Qazaqstannyń taǵy eki komandasy qurlyq birinshiliginiń qola júldegeri atandy.
Erler arasynda sablıadan Beksultan Abjal, Qýanysh Erǵashbaı, Erhan Qaraman jáne Qaınazar Nurqatuly úshinshi orynǵa ıe boldy.
Al áıelder arasyndaǵy komandalyq rapıra saıysynda Sofııa Aktaeva, Ksenııa Andreeva, Alena Gnoeva jáne Alına Iskanderova qola medal jeńip aldy.
Sondaı-aq shpaga boıynsha jekeleı synda Marııa Lesovskaıa kúmis júldege qol jetkizse, Polına Lesovskaıa qola medal ıelendi.
Eske salaıyq, buǵan deıin Kırıll Prohodov shpagadan jekeleı synda altyn medal jeńip alsa, Qaısha Jánibek sablıadan kúmis júldeger atandy. Al Dılıara Isabekova qola medal ıelengen bolatyn.
Osylaısha, Qazaqstan quramasynyń qorjynynda Azııa chempıonatynyń toǵyz medali bar. Onyń úsheýi – altyn, ekeýi – kúmis, tórteýi – qola.
Aıta ketelik Qazaqstan balýandary kúresten álem chempıonatyn bes medalmen qorytyndylaǵan edi.
