Qazaqstan semserlesýden tórt aıda úsh tarıhı jeńiske qol jetkizdi
ASTANA. KAZINFORM – Semserlesýden Qazaqstannyń erler quramasy keıingi tórt aıda Azııa chempıonatynda, álem chempıonatynda jáne Azııa oıyndarynda jeńiske jetip, tarıhı nátıjege qol jetkizdi.
Usynylǵan derekke sáıkes, buǵan deıin erler arasyndaǵy sapymen semserlesýden birde-bir qurama bir jyl ishinde qurlyq chempıonatyn, álem chempıonatyn jáne qurlyqtyq oıyndardy qatarynan jeńip kórmegen.
Bul Qazaqstan sporty úshin de buryn-sońdy bolmaǵan jetistik. Buǵan deıin elimizdiń birde-bir komandasy bir maýsymda halyqaralyq kúntizbedegi barlyq basty jarysta top jarmaǵan.
Álemdik sportta osyndaı aýqymdy jetistikterge arnaıy ataý berý qalyptasqan. Máselen, tennıste «Úlken dýlyǵa», fýtbolda «trebl» uǵymy qoldanylady. Semserlesýde mundaı jeńister serııasyn sıpattaıtyn resmı termın joq. Degenmen jetistiktiń aýqymyna qaraı Qazaqstan quramasy bir maýsymda ózindik «Úlken dýlyǵasyn» jınady deýge bolady.
Qazaqstan quramasynyń jeńisti joly maýsym aıynda Delıde ótken Azııa chempıonatynan bastaldy. Ulttyq qurama qurlyq birinshiliginde top jaryp, maýsymdaǵy alǵashqy iri jeńisine qol jetkizdi.
Arada bir aı ótkende Gonkongta ótken álem chempıonatynda qazaqstandyq semserlesýshiler komandalyq saıysta alǵash ret álem chempıony atandy.
Jeńisti serııa Nagoıadaǵy Azııa oıyndarynda jalǵasty. Fınalda Rýslan Qurbanov, Kırıll Prohodov, Vadım Sharlaımov jáne Erlik Sertaı Ońtústik Koreıa quramasymen kezdesti.
Sheshýshi básekede Qazaqstan quramasy toǵyz upaı aıyrmasymen jeńilip jatqanymen, esepti ózgertip, 43:42 esebimen jeńiske jetti.
Osylaısha, Qazaqstan erler quramasy araǵa 24 jyl salyp Azııa oıyndarynyń jeńimpazy atandy. Buǵan deıin qazaqstandyq semserlesýshiler 2002 jyly Pýsanda ótken Azııa oıyndarynda altyn medal ıelengen edi.
Qazaqstan quramasynyń jetistigi álemdik semserlesýdegi básekeniń joǵary deńgeıimen de erekshelenedi. Frantsııa, Italııa, Japonııa jáne Ońtústik Koreıa sekildi elderde semserlesýdiń ǵasyrlyq dástúri, qýatty sport rezervi jáne Olımpıada chempıondarynyń birneshe býyny qalyptasqan.
– Memleket basshysynyń tapsyrmasy boıynsha biz olımpıadalyq sport túrlerin júıeli túrde damytyp, sportshylarymyzdyń álemdik deńgeıde básekege qabiletti bolýy úshin qajetti jaǵdaı jasap kelemiz. Bul nátıje – memlekettiń zor qoldaýymen Federatsııanyń, jattyqtyrýshylar shtaby men sportshylardyń júıeli jumysynyń jemisi. Federatsııa zamanaýı ádistemeler men ǵylymı tásilderdi engizip keledi. Al tájirıbe almasý maqsatynda memleket tarapynan tartylǵan sheteldik mamandar otandyq jattyqtyrýshylarymyzdyń jumysyn kúsheıtýge úles qosýda, – dedi Týrızm jáne sport mınıstri Erbol Myrzabosynov.
Qazaqstan semserlesý federatsııasynyń prezıdenti Mırbolat Ábýov qazirgi quramanyń jetistigi el sporty tarıhynda aıryqsha oryn alatynyn atap ótti.
– Menińshe, búginde bul komanda ańyzǵa aınalǵan qurama degen atqa ábden laıyq. Nátıje ósken saıyn bizge artylatyn úmit pen jaýapkershiliktiń de arta túsetinin túsinemiz. Biz bul jetistikti sońǵy meje emes, endi saqtap qalýymyz qajet jańa deńgeı dep qabyldaımyz. Alda Olımpıadaǵa irikteý kezeńi tur. Kelesi mindetimiz – joǵary deńgeıimizdi uzaq merzimde dáleldeý, – dedi ol.
Ulttyq quramanyń tarıhı nátıjesi Týrızm jáne sport mınıstrligi, Qazaqstan semserlesý federatsııasy, jattyqtyrýshylar shtaby men sportshylardyń birlesken jumysynyń nátıjesi retinde baǵalanyp otyr.
Aıta keteıik, buǵan deıin Qazaqstannyń erler quramasy semserlesýden álem chempıonatynda tuńǵysh ret komandalyq synda altyn medal jeńip alǵan bolatyn.
