Qazaqstan semserlesýden ótken óz alańyndaǵy álem kýbogyn bir medalmen aıaqtady
ASTANA. KAZINFORM – Qazaqstannyń semserlesý boıynsha shpagashylar quramasy Astanada ótken álem kýbogyndaǵy ónerin qorytyndylady.
Baǵdarlamanyń sońǵy túri retinde erler arasyndaǵy komandalyq jarystar ótti.
Qazaqstandyqtar úshinshi oryn úshin matchqa deıin jetti. Elmır Alımjanov, Nıkıta Jýlınskıı, Vadım Sharlaımov jáne Aleksandr Fedotov qola medal úshin Japonııamen synǵa tústi.
Tartysty ótken kezdesýde Japonııa quramasy eki upaı aıyrmasymen jeńiske jetti – 44:42. Qazaqstan quramasy 4-oryn aldy.
Osylaısha, týrnır qorytyndysy boıynsha Qazaqstan bir medalmen shekteldi. Bir kún buryn Rýslan Kýrbanov jekeleı synda kúmis júldege ıe bolǵan edi.
Buǵan deıin semserlesýden Qazaqstan erler komandasy álem kýbogynyń jartylaı fınalyna shyqqanyn jazǵan edik.
