Qazaqstan Semeı men Óskemendegi jylý elektr ortalyǵyn ózi salýy múmkin

ASTANA. KAZINFORM — Semeı jáne Óskemen qalasynda salynatyn jylý elektr ortalyǵy (JEO) qurylysyn qarjylandyrý týraly sheshim aldaǵy aıda qabyldanady.

Bul týraly Energetıka vıtse-mınıstri Suńǵat Esimhanov málim etti.

— Kókshetaýda jylý elektr ortalyǵyn salý boıynsha sheshim qabyldandy, ol jobany «Samuryq-Energo» júzege asyrýǵa kiristi. Al Semeı men Óskemenge kelsek, memleketaralyq kelisim aıasynda kelissóz júrgizilgenimen, ókinishke qaraı, búgingi kúnge deıin Reseı tarapynan qarjylandyrý rastalǵan joq. Sondyqtan jobalardy óz kúshimizben júzege asyrý máselesin belsendi qarastyryp jatyrmyz, — deıdi Suńǵat Esimhanov Úkimet otyrysynan keıin ótken baspasóz máslıhatynda.

Vıtse-mınıstrdiń aıtýynsha, túpkilikti sheshim qyrkúıekte qabyldanady.

Eske salsaq, byltyr sáýirde Qazaqstan Respýblıkasy men Reseı Federatsııasynyń energetıka mınıstrlikteri arasynda Kókshetaý, Semeı jáne Óskemen qalalarynda JEO salý jobalary boıynsha yntymaqtastyq týraly kelisimge qol qoıyldy. 

Keıin elimizdiń úsh qalasynda salynatyn jylý elektr ortalyqtary «Samuryq-Energo» kompanııasynyń teńgeriminde bolatyny belgili boldy. 

Energetıka mınıstrliginiń aqparaty boıynsha Kókshetaýdaǵy jylý ortalyǵy 2029 jyly, Óskemendegi ortalyq 2031 jyly, al Semeıdegi ortalyq 2032 jyly tolyq paıdalanýǵa beriledi.