Qazaqstan saıttaryna túsken vırýs-maıner qanshalyq qaýipti

ASTANA. QazAqparat - QR Qorǵanys jáne aeroǵarysh ónerkásibi mınıstrliginiń Aqparattyq qaýipsizdik komıteti Qazaq torap aqparat ortalyǵyna www.balans.kz, kodeks.kz  jáne urist.kz ınternet resýrstarynan tabylǵan vırýs-maınerlerge qatysty shara qoldaný úshin tıisti habarlama jiberdi. Bul jaıly komıtettiń baspasóz qyzmetine silteme jasap «QazAqparat» HAA habarlaıdy.

Maıner zııankes skrıptisi paıdalanýshy saıtty ashqan kezde «oıanyp», kompıýterdiń Monero krıptovalıýtasyn óndirý protsesin júrgizetin ortalyq protsessor qurylǵysyn iske qosady. Sonyń arqasynda qaskóıler krıptovalıýtany shabýyl jasalǵan mashına resýrstarynyń esebinen alady.

Atalǵan saıtqa kiretin barlyq paıdalanýshyǵa óz kompıýterin antıvırýspen tekserip otyrý qajettigi eskertiledi. Saıttan júktep alynǵan faıldardy da ashpas buryn jeke tekserý qajet. Maınerden qorǵaný úshin braýzerdiń fýnktsıonaldyq múmkindikterin keńeıtetin baǵdarlamalardy paıdalanǵan jón. Olar mundaı zııankes skrıptilerdi buǵattaıdy.

«Qazaq torap aqparat ortalyǵy» (KazNic) Internet jelisinde .KZ domendik ataýyn qoldanýyn basqarady jáne baqylaıdy. Osyǵan oraı, Tirkeý erejelerine sáıkes, Internettiń Qazaqstan segmentindegi keńistiginde Internetti qaýipsiz paıdalanýǵa qaýip tóndiretin zııandy baǵdarlamalyq jasaqtama anyqtalǵan ınternet-resýrstyń domendik ataýyn paıdalaný toqtatylady.

Eske sala ketsek, búgin qazaqstandyq BAQ-ta www.balans.kz, kodeks.kz jáne urist.kz ınternet-resýrstarynda vırýs-maınerler paıda bolǵany týraly aqparat taralǵan edi.