Qazaqstan saılaý arqyly ózin taǵy da álemge tanytty - Elbasy
ASTANA. 8 sáýir. QazAqparat /Aıdar Ospanalıev/ - «Biz birige otyryp, durys sheshim qabyldadyq», - dedi búgin QR Parlamenti Májilisinde palata depýtattary QR Premer-Mınıstri laýazymyna Kárim Másimovty taǵaıyndaýǵa kelisimin bergennen keıin sóılegen sózinde Elbasy Nursultan Nazarbaev.
Otyrys barysynda qalyń kópshiliktiń saılaý barysynda ózin qoldaǵany úshin rızashylyǵyn bildirgen Elbasy: «Biz ótkendegi qarqynmen referendým ótkizetin bolsaq, bizge ońaı bolmaıtyn edi. Sebebi biz keshe ǵana Eýropadaǵy qaýipsizdik jáne yntymaqtastyq uıymyn basqaryp, onyń Sammıtin ótkizdik. Onyń ústine referendým ótkizsek, osy halyqaralyq uıymǵa tóraǵalyǵymyzdy qoldaǵan memleketterdi de jaısyz jaǵdaıǵa qaldyratyn edik. Sondyqtan biz durys sheshim qabyldadyq», - dedi.
Prezıdent sózinde ózin álemniń kóptegen elderiniń basshylary quttyqtap jatqandyǵyn jetkizdi. «Sonyń barlyǵy Qazaqstannyń saılaý arqyly ózin taǵy da álemge tanytqandyǵynyń belgisi. Bul elimizge álemniń nazaryn aýdaryp, ınvestorlardyń kóptep kelýine ıgi yqpal etetin jaǵdaı. Árýaqytta qandaı sheshim bolsa da, oıymyz eldiń qamy bolýy kerek. Memlekette jaǵdaı ońtaıly túrde ózgerip turýy kerek. Halyqtyń ál-aýqaty az da bolsa, ońalyp otyrýy kerek. Sonda bizdi halyq ta qoldaıtyn bolady. Bizge ishimizdiń bútindigin, tynyshtyǵymyzdy oılaý kerek. Kópultty halyqtyń arasyndaǵy dostyqty oılaý kerek», - dedi Elbasy.
